«ՀՀ-ին կոչ ենք անում Եվրասիական տնտեսական միության հետ հարաբերություններն ավարտին հասցնել, որ կարողանանք հասկանալ, թե ապագայում ինչպես ենք շարունակելու մեր երկկողմանի հարաբերությունները»,-այսօր ՀՀ նախագահի նստավայրում հրավիրված ԵՄ խորհրդատվական խմբի վերջին նիստին հայտարարեց ԵՄ պատվիրակության ղեկավար, դեսպան Տրայան Հրիսթեան: Նա շեշտեց, թե դա կարևոր է համակարգելու իրենց գործունեությունը՝ ելնելով օրենսդրական պահանջներից:
ԵՄ դեսպանը շեշտեց, թե ԵՄ-ն պատրաստ է շարունակել Հայաստանին աջակցություն մատուցել:
2009-ին մեկնարկած ծրագրի շրջանակներում տրամադրվել է քաղաքականության հարցերով խորհրդատվություն, ժողովրդավարության և մարդու իրավունքների, արդարադատության և այլ ոլորտներում իրականացվող բարեփոխումների ուղղությամբ: ԵՄ խորհրդատվական խումբն ավարտում է ՀՀ-ում հնգամյա գործունեությունը:
ՀՀ նախագահի աշխատակազմի ղեկավար Վիգեն Սարգսյանը հայտարարեց, թե 2009-ից ՀՀ-ի և ԵՄ-ի խմբերի միջև տեղի են ունեցել խորհրդատվական հանդիպումներ մարդու իրավունքների ոլորտում: Այնուհետև պարոն Սարգսյանն ընդգծեց. «Եվրասիական տնտեսական միության անդամակցության հետ մեկտեղ ՀՀ-ն պատրաստ է առաջ մղել ԵՄ-ի հետ փոխգործակցությունը ժողովրդավարության, մարդու իրավունքների, բազմաոլորտ տնտեսական համագործակցության և այլ ոլորտներում»:
Կարդացեք նաև
Վիգեն Սարգսյանը տեղեկացրեց, որ ներկայումս հայկական կողմը Բրյուսելի հետ քննարկում է իրավական նոր շրջանակի ձևավորման հարցեր ու մեր նպատակն է պահպանել ԵՄ-ի հետ հարաբերությունների համատեղելիությունը ինտեգրացիոն այլ ձևաչափերի հետ:
ՀՀ ԱԺ նախագահի տեղակալ Էդուարդ Շարմազանովն էլ տեղեկացրեց, որ 2015-ին ՀՀ-ում կկազմակերպվի Եվրանեսթի լիագումար նիստը և շեշտեց այն, որ ՀՀ ԱԺ-ն կարևորում է համագործակցությունը ԵՄ-ի հետ:
Տաթև ՀԱՐՈԻԹՅՈՒՆՅԱՆ
