Ավան եւ Նոր Նորք վարչական շրջանների ընդհանուր իրավասության դատարանի նախագահ Սամվել Ուզունյանի կայացրած որոշմամբ արձանագրվել են բոլոր բացթողումները եւ բավարարվել է քաղավիացիայի պետ Հովհաննես Երիցյանի զոհերից մեկի՝ Գայանե Թումասյանի հայցը՝ քննչական մարմնին պարտավորեցնելով վերացնել «Քրեական գործի վարույթը կարճելու մասին» որոշումը: Ի դեպ, եթե քննչական մարմինը չբողոքարկի ընդհանուր իրավասության դատարանի որոշումը, ապա կվերսկսվի կեղծ գործարքի գործով նախաքննությունը, որի ընթացքում կարող է բացահայտվել ողջ ճշմարտությունը:
Ըստ դատարանի. «Դատարանը փաստում է, որ քննիչն օբյեկտիվ եւ լրիվ քննություն իրականացնելու համար պետք է պարզեր Հովհաննես Երիցյանի գտնվելու իրական վայրը, այնինչ, անհրաժեշտ միջոցներ չի ձեռնարկել հայտնաբերելու վերջինիս եւ կանչելու հարցաքննության»:
Նշենք, որ քննչական մարմնում նյութերի նախապատրաստման ժամանակ անգամ Հովհ. Երիցյանը չի հարցաքննվել, քննիչն, իբր, «չի կարողացել պարզել Երիցյանի փաստացի բնակության հասցեն», եւ վարույթը կարճվել է:
Ոստիկանության Նոր Նորքի բաժնի ավագ քննիչ Ս. Պողոսյանը ցանկության դեպքում կարող էր Երիցյանին հայտնաբերել:
Կարդացեք նաև
Ակնհայտ է, որ հայտնի է եղել Երիցյանի փաստացի բնակության հասցեն, սակայն քննչական մարմինը շահագրգռված լինելով՝ որեւէ քայլ չի ձեռնարկել:
Նախաքննության ժամանակ եղել են հակասություններ, սակայն քննիչը հակասությունների հետ կապված չի կատարել առերեսումներ:
Մասնավորապես, առերեսումներ կարող էին լինել իրեն տուժող համարող Գայանե Թումասյանի եւ Երիցյանի սանիկ Վահե Վարդանյանի միջեւ, ում անմիջական մասնակցությամբ էլ կնքվել է տան առքուվաճառքի շինծու պայմանագիրը:
Նշենք, որ տուժող Գայանե Թումասյանը հանցագործության մասին հաղորդում էր ներկայացրել ոստիկանության Նոր Նորքի բաժին: Նա հայտնել էր, որ Հովհաննես Երիցյանը շինծու գործարքի շնորհիվ է տիրացել իր սեփականությանը, կատարել է խարդախություն, կեղծել է փաստաթղթեր:
Ի դեպ, Գայանե Թումասյանի ամուսինը դատարանում ցուցմունք էր տվել այն մասին, որ տարիներ շարունակ տոկոսով գումար է վերցրել ՀՀ քաղավիացիայի նախկին պետ Հովհաննես Երիցյանից:
Ամուսնու խոսքով` Երիցյանը իրեն ստիպել է կնքել ոչ թե գրավի պայմանագիր, այլ սեփականության առքուվաճառքի, որով տունն անցել է Երիցյանին, սակայն անշարժ գույքը վերադարձնելու պայմանով, երբ ինքը կվճարեր վերցրած 400 հազար դոլար մայր գումարն ու ամսական տոկոսները:
Գայանե Թումասյանը դիմել էր դատարան՝ պահանջելով առքուվաճառքի պայմանագիրը չեղյալ համարել:
Տեղեկացնենք, որ առաջին ատյանի դատարանը մերժել էր Գայանե Թումասյանի դիմումը, սակայն Վերաքննիչ դատարանը բեկանել է այդ դատավճիռը:
Հովհաննես Երիցյանը բողոքարկել է Վերաքննիչ դատարանի որոշումը:
ԱՐՄԵՆ ՍԱՐԳՍՅԱՆ
«Առավոտ» օրաթերթ
12.11.2014
