Ազատամարտիկ Սուրեն Սարգսյանը պնդում է, որ իրեն ծեծի ենթարկելուց հետո իշխանությունից մարդիկ են մոտեցել իրեն ու վստահեցրել, որ Սերժ Սարգսյանին ձեռնտու չէր իր հետ տեղի ունեցած միջադեպը:
Թե ովքեր են այդ հավաստիացումների հեղինակները, Սուրեն Սարգսյանը չի ցանկանում մանրամասնել. «Անուններ չեմ ուզում տալ, բայց որ այդ մարդիկ, սերտ են, մերձ են իշխանություններին, ինձ համառորեն ասում էին `չէ Սերժ Սարգսյանին ձեռնտու չէ»:
Մեր հարցին, թե դուք ի՞նչ եք կարծում, ձեռնտու էր, թե՞`ոչ, ազատամարտիկը շարունակեց. «Արամ Մանուկյանի տարբերակում մուռ հանեցին, չնայած Արամը Սերժ Սարգսյանին մայր չի հայհոյել, ասել է` տիրոջ մերը: Պարզապես ցուցադրաբար վրեժ հանեցին, մի հիմարի ուղարկեցին, որ հարվածի: Տղաների`մեր ընկերների, պարագայում, Երանոսյան Լյովա կոչվածն ուղղակի պատրաստ չի եղել այդ ելույթին: Որ իր վրա «չեպե» չլինի, թե իր մոտ տղաները նախագահին բան են ասել, ու ուրիշները նախագահին խաբար չտան, թե ինքը լսել ու լռել է, փորձեց արդարացնել իրավիճակն իր այդ հայտարարությամբ»:
Սուրեն Սարգսյանը դժվարացավ ասել, թե իր վրա հարձակման հետեւում ով է կանգնած. «Իմ պարագայում ամիսներ շարունակ ես էդ մեքենաները տեսել եմ, եկել, կանգնել են, ինձ թվացել է՝ հատուկ ծառայությունների մեքենաներն են: Կարծում եմ՝ էլի հատուկ ծառայություններ են, ինչ են, բայց այդ մարդիկ հստակ գիտեին իրենց գործը, պրոֆեսիոնալներ էին, հենց այնպես քուչի տղու ծեծող չէին: Ամեն մեկը գիտեր իր հարվածը, որը որտեղ խփի: Եթե Սերժ Սարգսյանին ձեռնտու չէ ասողների տրամաբանությունից նայես, ինձ սպանել տալը Սերժ Սարգսյանի շահերից չէր բխում, բայց դա չի նշանակում, որ իրենք չգիտեն՝ ովքեր են ծեծողները եղել: Պարզապես ուժները չի հերիքում բացահայտել»:
Կարդացեք նաև
Ազատամարտիկի համոզմամբ, իր վրա հարձակումը փորձ էր ազատամարտիկներին սրելու. «Փորձեն, տեսնեն արդյո՞ք ազատամարտիկները կսկսեն հաշվեհարդար տեսնել աջ ու ձախ»:
Նա ոստիկանություն չի դիմել ու չի պատրաստվում կատարվածի համար դիմել՝ պնդելով, որ իրավապահ համակարգը ոչինչ չի բացահայտելու:
Արփինե ՍԻՄՈՆՅԱՆ
