«Իրենք չեն ուզում պատերազմ ստեղծել, իրենք ուզում են լարվածության մեջ պահել հասարակությանը,- հունվարի 28-ին, «Տեսակետ» մամլո ակումբում լրագրողների հետ հանդիպման ընթացքում, անդրադառնալով շփման գծում լարվածությանը, հայտարարեց «Արծիվ մահապարտների միություն» հասարակական կազմակերպության նախագահ, գեներալ-մայոր Աստվածատուր Պետրոսյանը:
Նրա խոսքերով՝ հայկական բանակի մարտական պատրաստվածությունը շատ բարձր է, եւ նա պատրաստ է ցանկացած լայնամասշտաբ պատերազմի. «Երբ որ զինվորը խաղաղ ժամանակ գտնվում է դիրքերում, շատ դեպքերում ավելի դժվար է զսպել, քան պատերազմում, երկու կողմից էլ ոտնձգություն պետք է լինի, երկու կողմից էլ ուժերի փորձարկում պետք է լինի: Իրենք ուզում են կայանալ, գնում են սովորում են, ասում են՝ գնա խփի, տեսնենք, եթե հաջողվեց, քեզ Սաֆարովի նման կոչում կտանք, եթե չհաջողվի կոչումներ չես ստանա: Սա նաեւ մեր քաղաքական գործիչների խնդիրն է, որ միայն բանակի լեզվով պետք չի խոսել»:
Աստվածատուր Պետրոսյանը հավելեց, որ անհրաժեշտ է բանակցային գործընթաց, որպեսզի հայկական կողմը հասկանա, թե ադրբեջանական կողմը կրակելով ինչի է ուզում հասնել. «Աշխարհի բոլոր բանակների փորձը մենք ունենք, առաջ մենք այդ հնարավորությունը չունեինք: Համեմատած 1992 թվականի հետ մեր բանակը 10 քայլ զարգացում է ապրել, բանակի ուժը չի կարելի թերագնահատել մեկ կրակոցի պատճառով, այդ պատճառով բանակին անհրաժեշտ է, որ զինվորը լինի նաեւ պրոֆեսիոնալ»:
Ամի ՉԻՉԱԿՅԱՆ
Կարդացեք նաև
Լուսանկարը` PHOTOLUR-ի
