Սեպտեմբերի 20-ին ՀՀ սփյուռքի նախարար Հրանուշ Հակոբյանը մասնակցեց Մուսա լեռան հերոսամարտի 100-ամյակին նվիրված միջոցառումների շրջանակում Մուսալեռի հուշահամալիրում կազմակերպված պատարագին և հարիսայի օրհնության արարողությանը:
Միջոցառմանը ներկա էին Արմավիրի մարզպետ Աշոտ Ղահրամանյանը, Արմավիրի թեմի առաջնորդ Տեր Սիոն եպիսկոպոս Ադամյանը, այլ պաշտոնյաներ, զբոսաշրջիկներ, ուխտավորներ:
Մայր Աթոռ Սուրբ Էջմիածնի միաբանների կողմից ՝ հայոց անմեղ նահատակների հոգիների հանգստության համար պատարագ մատուցվեց, ապա Սիոն եպիսկոպոս Ադամյանը ընթերցեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնությանը խոսքը:
Ողջունելով ներկաներին՝ ՀՀ սփյուռքի նախարար Հրանուշ Հակոբյանը նշեց. «Սիրելի՛ հայրենակիցներ, այսօր, իրոք, տոն է հայոց աշխարհում. տարբեր երկրներից Հայաստան են ժամանել Մուսա լեռան հերոսների շառավիղները: Սիրով ու ջերմությամբ շնորհավորում եմ բոլորիս Մուսա լեռան փառավոր 100-ամյա տարեդարձի առիթով: Հարյուր տարի առաջ թուրքն աշխարհի երեսից որոշեց ջնջել հայ ժողովրդին՝ թողնելով միայն մեկ հայ, այն էլ թանգարանում: Իրականություն չդարձավ նրա երազանքը: Հայի անպարտ ոգին ըմբոստացավ, և մուսալեռցիները անհավասար մարտում կարողացան հաղթել: Այսօր Մուսալեռ ասելով հասկանում ենք հաղթանակ, հպարտություն և հայի կամք: Սիրելի մուսալեռցիներ շնորհակալ ենք, որ պահպանում եք մեր պապերի թողած բոլոր ավանդույթները, հատկապես խորին շնորհակալություն եմ հայտնում այնճարցիներին, որոնք մի յուրօրինակ, փոքրիկ Հայաստան են կերտել Լիբանանում և իրական Մուսալեռի ոգին ու շունչը կարողացել են պահպանել և փոխանցել սերունդներին»:
Կարդացեք նաև
Իր խոսքում Հրանուշ Հակոբյանը ողջունեց տարբեր երկրներում և, հատկապես, Թուրքիայի Վագըվ գյուղում հաստատված մուսալեռցիներին, ովքեր, հաղթահարելով դժվարությունները, եկել են մասնակցելու միջոցառումներին:
Նախարարը շնորհավորեց ներկաներին նաև առաջիկա Անկախության տոնի առթիվ և ասաց. «Մեր պապերի ցանկությունն ու երազանքը իրականություն դարձավ 1991թվականին, և մենք, նրանց կամքին ու ոգուն համաձայն, վաղը միասնաբար նշելու ենք Ազատ, Անկախ Հայաստանի Հանրապետության տոնը, այդ հրաշալի առիթով շնորհավորում եմ բոլորիդ: Մենք նաև, ի հեճուկս, թուրքի, ոչ միայն Ազատ ու Անկախ Հայաստան, այլև Արցախի Հանրապետություն ստեղծեցինք: Այսօր մենք ունենք երկու անկախ հանրապետություն: Հիշե՛ք, Հայաստանը համայն հայության Հայրենիքն է, Հայաստանը բոլորինս է: Մենք ողբի ու որբի Հայրենիքից այսօր կառուցում ենք ազատ, անկախ, հզոր Հայաստան»:
Ներկաներին ողջունեց Մուսա լեռան հերոսամարտի 100-ամյակի կենտրոնական մարմնի նախագահ Եսայի Հավաթյանը, նա մասնավորապես ասաց. «Հայրենակիցնե՛ր, մենք թուրքին հաղթած ժողովուրդ ենք, այս տոնակատարությունը հաղթանակի տոնակատարություն է, միշտ և ամենուրեք պետք է հպարտ լինենք հայ և մուսալեռցի լինելու համար, հայը հաղթանակած ազգ է այժմ, ընդմիշտ և հավիտյան»:
Մուսալեռցի գործիչներ Եսայի Հավաթյանը, Պերճ Ղազարյանը, Հակոբ Ջամբազյանը, Ժորժ Կևորկյանը Մուսալեռան հերոսամարտի 100-ամյակի առթիվ Հայրենիք-Սփյուռք կապերի ամրապնդման և զարգացման, ինչպես նաև թանգարանային համագործակցության մեջ ունեցած նշանակալի ավանդի համար պարգևատրվեցին Սարդարապատի հերոսամարտի հուշահամալիրի «Երվանդ Լալայան» հուշամեդալով և արժանացան Սարդարապատի հերոսամարտի հուշահամալիր, Հայոց ազգագրության և ազատագրման պայքարի պատմության ազգային թանգարանի բարեկամ տիտղոսին:
«Մուսալեռ» հայրենակցական միության երիտասարդական թևի պատասխանատուներ Գաբրիել Փանոսյանին թանգարանային համագործակցության մեջ ունեցած նշանակալի ավանդի համար հանձնվեց շնորհակալագիր:
Ներկաներին իրենց կատարումներով ներկաներին ողջունեցին Արսեն Գրիգորյանը (Մրոն), մի շարք պարային խմբեր և անհատ կատարողներ:
Հանդիսության վերջում տեղի ունեցավ հարիսայի օրհնության կարգ, որից հետո այն բաժանվեց ուխտավորներին:
Սփյուռքի նախարարություն
