«Հանրապետական կուսակցությունը ընդհանուր առաջարկ միշտ էլ արել է, հիմա էլ է անում, եթե կուսակցությունները կարծում են՝ կա ընդհանրություն, իհարկե մենք առաջարկությանն ընդառաջում ենք: Մենք չենք բացառում, որ այլ քաղաքական ուժի հետ էլ համագործակցենք: Մենք առաջարկում ենք, մենք դռները բացում ենք, չենք խնդրում: Եթե որեւէ կուսակցություն չի ուզում, շուտ է համարում կամ ժամանակը չի համարում, սպասում է ինչ-որ բաների, դա իր խնդիրն է, դեռեւս ժամանակ կա»,- այսօր լրագրողների հետ հանդիպման ժամանակ հայտարարեց ԱԺ ՀՀԿ խմբակցության պատգամավոր Լեռնիկ Ալեքսանյանը՝ խոսելով քաղաքական դաշտում տեղի ունեցող ամենաքննարկվող իրադարձության՝ ՀՀԿ-ի եւ ՀՅԴ-ի համագործակցության մասին:
Նա նշեց, որ ՀՅԴ-ի հետ համագործակցությունը հիմա՝ մինչ ընտրություններն են տեղի ունենում, քանի որ Դաշնակցությունը Հանրապետականի հետ համագործակցեց նաեւ սահմանադրական փոփոխությունների ժամանակ: «Եվ այդ բազան է, որ դա լինի ընտրություններից առաջ: Կոալիցիոն կազմակերպություն ստեղծելու մասին չէ խոսքը: Թե ինչ ձեւաչափով կլինի, կերեւա առաջիկայում, մասնակցության, համագործակցության աստիճանից»:
Լրագրողներից մեկի դիտարկմանը, թե ինչու են համագործակցում խորհրդարանում ներկայացված ամենափոքր քաղաքական ուժերից մեկի հետ, որի ընտրազանգվածն էլ փոքր է, պարոն Ալեքսանյանն ասաց. «Նախ այստեղ մեծ ու փոքրի հարցը չէ: Մեծ ու փոքրը պայմանավորված չէ լոկ պատգամավորների թվով, մեծ ու փոքրը կախված է հասարակության մեջ կայուն քաղաքականությունից: Ճիշտ ու սխալի մասին էլ չէ խոսքը, հնարավոր է նախկինում սխալ բաներ արած լինեն»:
Պարոն Ալեքսանյանը նշեց, որ ՀՅԴ-ն առանձնանում է կայուն գաղափարախոսությամբ եւ սկզբունքայնությամբ որոշ հարցերի նկատմամբ, եւ կարեւոր էլ չէ՝ դրանք լավն են, թե վատը, վատերը կվնասազերծվեն: «Այսօր ամենաբացասական բանը քաղաքականությունում գաղափարախոսության, սկզբունքայնության բացակայությունն է, խառնել է իրար ամեն ինչ,- ասաց պարոն Ալեքսանյանը՝ նշելով,- Այսօր Բագրատյանը կոչ է արել, որ միավորվեն, ես համոզված եմ, որ չեն միավորվի: Ինչո՞ւ, որովհետեւ քաղաքական դաշտում չկան սկզբունքներ»:
Կարդացեք նաև
Ըստ ՀՀԿ պատգամավորի՝ շուտով նաեւ Սահմանադրության շուրջ կձեւավորվեն բանավեճեր եւ դրանց արդյունքում կբացահայտվեն քաղաքական ուժերի ցանկությունները. «Եթե նույնիսկ Հանրապետական կուսակցությունը ինչ-որ նպատակներ ունի սահմանադրական փոփոխությունների հետ կապված, այլ կուսակցությունների ակտիվ մասնակցության դեպքում, հնարավոր է՝ Հանրապետականը չկարողանա իրականացնել»,- ասաց պարոն Ալեքսանյանը:
Հռիփսիմե ՀՈՎՀԱՆՆԻՍՅԱՆ
