«Եռաբլուրում մեր պատմական հերոսների կողքին այսօրվանից կհանգչի մերօրյա հերոս, 19-ամյա Ադամ Սահակյանը»,- այսօր սերժանտ, 1996 թվ.-ին ծնված հերոս Ադամ Սահակյանի հուղարկավորությունն էր, եւ ՊՆ պաշտոնյաները սփոփանքի խոսքեր էին ասում զինվորի ծնողներին:
Ադամը ապագա ճարտարապետ-դիզայներ է, ուսումը կիսատ է թողել՝ Արցախում ծառայելու համար. «Երիտասարդ, ավյունով ու կորովով լեցուն Ադամը ծառայության առաջին իսկ օրից աչքի է ընկել ընդգծված համեստությամբ, ինչը աննկատ չի մնացել հրամանատարների կողմից: Ադամը կրտսեր սերժանտի կոչում ունենալով, դիրքի հրամանատարի պարտականություններն է ստանձնել: Հայրենիքի սահմանների պահպանության պատվաբեր առաքելությունը Ադամի համար սուրբ է եւ նվիրական: Ապրիլի 1-ի, լույս 2-ի գիշերը հայոց հողը ներխուժած նենգ ու բարբարոս թշնամու հարձակումը պետք է կանխվեր՝ ինչ գնով էլ լինի: Ադամը ղեկավարեց իրեն վստահված դիրքի պաշտպանությունը: 18 տարեկան տղաները կռվում էին հատուկ պատրաստություն անցած պայմանագրային դիվերսանտների հարյուրավոր ոհմակի դեմ: Տղերքը կռվեցին, պայքարեցին մինչեւ վերջ, տղերքը նահատակվեցին: Սիրելի՛ Ադամ, մենք երախտապարտ ենք քեզ քո հերոսական կերպարի համար: Դու լքեցիր երկրային կյանքն ու միացար անմահներին: Ամեն անգամ խորը կսկիծով պիտի հիշենք քո կորուստը»,- Ադամի դագաղի մոտ ՊՆ-ի անունից այսպիսի ցավակցություն հայտնեցին:
Այնուհետեւ դիմելով Ադամի ծնողներին՝ ՊՆ պաշտոնյան ասաց. «Հարգելի՛ տեր եւ տիկին Սահակյաններ, մենք խոնարհվում ենք ձեր առաջ, շնորհակալություն հայտնում հայրենասեր եւ քաջարի որդի դաստիարակելու համար: Դուք տվեցիք մեզ դաստիարակված, ուժեղ, մարդկային բարձր որակներով օժտված զավակ, մենք ձեզ ենք վերադարձնում հերոս, ազգի՛ հերոս: Փառք ու պատիվ մեր բոլոր հերոսներին, ովքեր անձնվիրաբար մարտնչել եւ այսօր էլ մարտնչում են՝ բարձր պահելով հայ ժողովրդի պատիվը»:
Կարդացեք նաև
Ադամի մայրը հուղարկավորության ժամանակ «պատսպարվել» էր եկեղեցում՝ իր վշտի հետ: Եղբայրը տեղը չէր գտնում, իսկ հոր արցունքները զինաթափ էին անում ու հուզում հուղարկավորությանը ներկա պաշտոնյաներին՝ քաղաքաշինության նախարար Նարեկ Սարգսյանին, փոխքաղաքապետ Դավիթ Օհանյանին:
Հռիփսիմե ՋԵԲԵՋՅԱՆ
