Լոռու մարզում աղքատության ցուցանիշը կազմում է 36 տոկոս: Ըստ Լոռու մարզպետ Արթուր Նալբանդյանի, սրա արդյունքում էլ մեծանում է մարզից արտագաղթողների ու միգրանտների թիվը:
«Աղքատության տոկոսը մարզում բարձր է, որ մեզ չի կարող չանհանգստացնել: Արտագաղթ, միգրացիա, արտագնա աշխատանք եւ այլն, հենց աղքատության տոկոսն է պատճառը, որ մենք ունենք նման խնդիր: Բայց խորհրդային տարիներից արտագնա աշխատանքը այսպես ասած «մոդա» է եղել նաեւ Լոռու մարզի մի շարք համայնքներում՝ Տաշիրի եւ Սպիտակի մի քանի գյուղերում: Մինչեւ օրս էլ մարդիկ գնում են սեզոնային աշխատանքով զբաղվում եւ հետ են գալիս»:
Մարզի ղեկավարի կարծիքով Լոռիում աղքատության տոկոսի նվազեցման միակ ճանապարհը աշխատատեղ ստեղծելն է. «Մեր հիմնական խնդիրը Վանաձորում է: Որովհետեւ նախկին հսկա արդյունաբերական կենտրոնում էս պահին արդյունաբերության մասին մեղմ ասած խոսելը տեղին չէ: Եթե խորհրդային տարիներին արդյունաբերությունում 32.000 մարդ էր աշխատում, էս պահին 3000 աշխատող ունենք: Էս ուղղությամբ մենք աշխատում ենք»:
Արթուր Նալբանդյանն ասում է, որ երբեմնի արդյունաբերական քաղաք համարվող Վանաձորը զարգացնելու համար պետք է այլ ուղղություն ընտրել:
Կարդացեք նաև
«Ես գոնե համոզվել եմ, որ Քիմպրոմը 90 տոկոսով ի վիճակի չի աշխատելու: Ցանկացած արտադրանքի դեպքում իր արտադրած ապրանքը մրցունակ չի լինի որեւէ մի շուկայում: Դրա համար մենք պետք է Վանաձորի զարգացման ուղղությունը փոխենք: Վանաձորը կարող է զարգացնել օրինակ թեթեւ արդյունաբերությունը»:
Տաթեւիկ ՂԱԶԱՐՅԱՆ
