Թբիլիսիում ընթացող շախմատի աշխարհի գավաթի խաղարկության կիսաեզրափակչում հաղթանակը Լեւոն Արոնյանին անասելի ծանր տրվեց: Ֆրանսիացի Մաքսիմ Վաշյե-Լագրավի հետ թե դասական, թե 25, թե 10 ,թե 5 րոպեանոց երկուական պարտիաներն ավարտվեցին ոչ-ոքի: Հաղթողին որոշելու համար անցկացվեց «արմագեդոնը», որտեղ սպիտակներին հաղթանակի համար տրվում էր հինգ րոպե, սեւերին՝ չորս: Սակայն ոչ-ոքին եզրափակչի ուղեգիր տալիս էր սեւերով խաղացողին: Հենց այս փուլում Լեւոն Արոնյանին հաջողվեց կոտրել ֆրանսիացու դիմադրությունը:
Այսպիսով, հայկական շախմատի առաջատարը ոչ միայն մտավ եզրափակիչ, որտեղ հանդիպելու է չինացի Դին Լիժենի հետ, այլեւ անկախ այդ դիմակայության ելքից, հավակնորդների մրցաշարի իրավունք նվաճեց:
Աշոտ ՀԱԿՈԲՅԱՆ
Լուսանկարը՝ tbilisi2017.fide.com-ի
