Քիչ առաջ Մարդու իրավունքների եվրոպական դատարանը (ՄԻԵԴ) հրապարակեց հերթական վճիռն ընդդեմ Հայաստանի Հանրապետության։ Դիմումատուն Դանիայի Թագավորությունում Հայաստանի Հանրապետության արտակարգ և լիազոր դեսպան Ալեքսանդր Արզումանյանն է: Նա ՄԻԵԴ հայց է ներկայացրել տարիներ առաջ՝ մինչեւ 2017-ը՝ դեսպան նշանակումը:
Որպես ՀՀ արտաքին գործերի նախկին նախարար և «Քաղաքացիական անհնազանդություն» շարժման առաջնորդ, Ալեքսանդր Արզումանյանը բողոքարկում է իրեն կալանքի տակ պահելու հանգամանքը՝ «Փողերի լվացման» հայտնի գործով։ Ալեքսանդր Արզումանյանը ձերբակալվել էր 2007 թվականի մայիսին և կալանավորվել ապօրինի եկամուտների օրինականացման կասկածանքով։ Եվրոպական դատարանը բավարարել է Ալեքսանդր Արզումանյանի բողոքն ընդդեմ Հայաստանի Հանրապետության:
Մասնավորապես, ՄԻԵԴ-ը որոշել է, որ այս գործով տեղի է ունեցել Մարդու իրավունքների եվրոպական կոնվենցիայի 5-րդ և 3-րդ հոդվածների խախտում:
Եվրոպական դատարանի վճռի մեջ նշված է, որ Հայաստանի Հանրապետությունը պետք է դիմումատուին՝ Ալեքսանդր Արզումանյանին, դատարանի վճռի՝ վերջնական ուժի մեջ մտնելուց հետո երեք ամիսների ընթացքում վճարի 2500 եվրո. 2000 եվրոն ոչ նյութական վնասների, 500-ը դատական ծախսերի փոխհատուցման համար:
Տաթև ՀԱՐՈՒԹՅՈՒՆՅԱՆ
