Ընդամենը վերջերս էր, որ հայտարարվեց, թե ԱԺ պետաիրավական հանձնաժողովի նախագահ Արթուր Բաղդասարյանի գլխավորությամբ ստեղծվել է «Օրինաց երկիր» կուսակցությունը, սակայն, չնայած իր կարճ կյանքին, այդ կազմակերպության անվանումն արդեն իսկ վերաձեւվել է։ Այժմ այն ԱԺ մի խումբ պատգամավորներ ոչ թե օրինաց, այլ «Հորինած երկիր» են կոչում։
ՓՆՏՐՎՈՒՄ Է ՍԱՄՎԵԼ ՀԱԿՈԲՅԱՆԸ
Հուլիսի 22-ին «Առավոտը» էլեկտրոնային փոստով նամակ ստացավ Միլդեբուրգի բնակիչ Հանս Կոստերից։ Նա փնտրում է Երկրորդ համաշխարհային պատերազմում գերմանացիների կողմից գերված Սամվել Հակոբյանին՝ մոտավորապես 1921 թվի ծնված։ Գերի ընկնելուց հետո նրան ուղարկել էին հոլանդական Օուդորպ քաղաք, որտեղ 45 թվականին ծնվել է նրա որդին։ Վերջինս առ այսօր ապրում է Օուդորպում։
ՀՆՉԱԿՅԱՆ ՄԵԿԱՄՍՅԱ ՓՈՂԵՐ
Կարդացեք նաև
«Հնչակյան լրատուն» հրապարակել է ՍԴՀԿ Հայաստանի վարիչ մարմնի 98 թ. հունիս ամսվա բյուջեն։ Գրասենյակային ծախսեր՝ 35 հազար, տրանսպորտային ծախսեր՝ 25 հազար, միջոցառումներ՝ 145 հազար եւ մամուլ՝ 50 հազար դրամ։ Գումարման բարդ գործողությունը թողնում ենք ընթերցողին։
ՄԵԿ ԱՆԳԱՄ ԵՎՍ…
Թեպետ նախապես հայտարարվել էր, որ Լեռնային Ղարաբաղի Հանրապետության լրագրողների միության հիմնադիր համագումարը գումարվելու է հուլիսի 25-ին, սակայն հերթական անգամ այն հետաձգվել է։ Այդուհանդերձ, ղարաբաղցի լրագրողները մտադրվել են համագումարը հրավիրել մինչեւ օգոստոսի սկիզբը։
