Եվ ովքե՞ր տեղ կզբաղեցնեն Հայաստանի 2007 թվականի 10 լավագույն մարզիկների ցուցակում:
Մոտ օրերս Հայաստանի մարզական լրագրողները կորոշեն անցնող տարվա հանրապետության տասը լավագույն մարզիկներին:
Արդեն բաժանվել է մրցաշրջան 2007-ում իրենց լավագույն կողմերով դրսեւորած եւ ավանդական տասնյակում տեղ զբաղեցնելուն հավակնող տարբեր մարզաձեւերի ներկայացուցիչների նախնական ցուցակը, որից էլ ԶԼՄ-ներից ստացվելիք տարբերակների պարզ թվաբանական հաշվարկով կորոշվեն լավագույնները:
«Առավոտը» իր տարբերակը կազմելիս առաջնորդվում է որոշակի չափորոշիչներով՝ փաստերով, եւ համոզված է, որ դրանք արդարացի են: Առաջին հերթին հաշվի ենք առնում միջազգային պաշտոնական մրցումներում՝ օլիմպիական խաղերում, աշխարհի, Եվրոպայի մեծահասակների, երիտասարդների եւ պատանիների առաջնություններում (նկատի ենք ունենում դրանց մարզական կարգը) ձեռք բերված նվաճումները: Այնուհետեւ գալիս են աշխարհի գավաթի խաղարկությունները, համաշխարհային ունիվերսիադաները, միջազգային հեղինակավոր մրցաշարերը: Հավասարության դեպքում նախապատվությունը տալիս ենք այն մարզիկին, որը առավել հաջող է հանդես եկել վերոնշյալ առաջնություններից հաջորդում: Օրինակ, եթե մի մարզիկ դարձել է, ասենք, աշխարհի առաջնության արծաթե մեդալակիր եւ նվաճել նաեւ Եվրոպայի չեմպիոնի կոչումը, իսկ մյուսը աշխարհի «արծաթից» բացի՝ աշխարհի գավաթի խաղարկության փուլի 2-րդ մրցանակակիր, ցուցակում ավելի բարձր հորիզոնականում նշում ենք առաջինին:
Տարանջատում ենք նաեւ օլիմպիական եւ ոչ օլիմպիական մարզաձեւերը: Ամենեւին էլ ոչ օլիմպիական մարզաձեւերը չանտեսելով՝ մոտավոր հավասարության պարագայում գերադասում ենք նախ եւ առաջ տասնյակ ընդգրկել օլիմպիական մարզաձեւերի ներկայացուցիչներին: Եվ որ նույնպես սկզբունքային մոտեցում ենք համարում, աշխատում ենք փաստացի արդյունքների հաշվին տասնյակում մարզաձեւերի արհեստական բազմազանություն չստեղծել՝ ընտրելով միայն ամենաարժանավորներին: