«Եթե դատարանն առաջնորդվեր իրավական գործընթացներով և իրոք պաշտպաներ արդարադատությունը, Գագիկ Ծառուկյանը ոչ պետք է կալանավորվեր այս գործով, ոչ էլ ձերբակալվեր։ Փաստաբանների հրապարակած փաստերն ու ձայնագրությունները խոսում էին այն մասին, որ այս մարդն անմեղ է»,- «Բարգավաճ Հայաստան» կուսակցության ղեկավար Գագիկ Ծառուկյանի գործով դատական նիստից առաջ լրագրողների հետ ճեպազրույցում նշեց ՀՀԿ գործադիր մարմնի անդամ Էդուարդ Շարմազանովը:
«Սա բացահայտ քաղաքական ռեպրեսիա է «Բարգավաճ Հայաստան» կուսակցության նախագահի նկատմամբ, որը միակողմանի է և հստակ ուղղված է նրա քաղաքական գործունեության դեմ։ Մենք բոլորս այստեղ ենք արդարադատության ակնկալիքով, որովհետև արդարադատությամբ առաջնորդվելու դեպքում (և ոչ թե քաղաքական իշխանության կապրիզներով, շանտաժներով ու հրահանգներով) Գագիկ Ծառուկյանի կալանքը ոչ միայն չպետք է երկարացվեր, այլեւ, ինչպես իրավապաշտպաններն են նշում, օրենքի տառը պահպանելու դեպքում նույնիսկ չպետք է ձերբակալվեր, էլ չեմ խոսում նման անմարդկային կալանավորման մասին։
Կարդացեք նաև
Չնայած այս մեծ ռեպրեսիաներին՝ Ծառուկյանը պինդ կանգնած է իր ազգային արժանապատվության և արժեքների կողքին։ Նա կալանավայրից հասարակությանը հստակ մեսիջներ է հղում, որ ինքը ոչինչ ապօրինի չի արել, կանգնած է Հայաստանի անկախության կողքին և այնտեղից շատ ավելի պարզ է ներկայացնում այն վտանգները, որոնց առաջ կանգնած է Հայաստանը, և թե ինչու են իրականացվում այս քաղաքական բռնաճնշումները։ Ազատություն եմ մաղթում և՛ Գագիկ Ծառուկյանին, և՛ բոլոր քաղաքական բանտարկյալներին՝ առանց բացառության»,- ասաց Շարմազանովը։
Նրա ձևակերպմամբ՝ Փաշինյանի նպատակը մեկն է՝ վախեցնել ընդդիմադիրներին, նախ՝ խորհրդարանական, հետո նաև այն բոլոր գործիչներին, ովքեր ընդդիմանում են Ալիևի պահանջով նոր սահմանադրության ընդունմանը։
Գոհար ՀԱԿՈԲՅԱՆ
