Բրիտանացի գիտնականների կատարած հետազոտությունների շնորհիվ ապացուցվեց ճանաչողական վարքագծային թերապիայի մեթոդներով ընկճախտի բուժման արդյունավետությունը՝ առանց բժշկին այցելելու:
Հետազոտությանը մասնակցել է ընկճախտով տառապող 18-75 տարեկան 297 մարդ: Նրանց մի մասը 16 շաբաթվա ընթացքում պետք է մասնակցեր 10-ից ավելի չաթ-սեանսների՝ յուրաքանչյուրը 55 րոպե տեւողությամբ, իսկ մյուս մասն այցելում էր հոգեթերապեւտի:
Ըստ doctors.am-ի՝ 4 ամիս անց օնլայն-թերապիայի կուրս անցնող խմբի 38 տոկոսն արդեն բուժվել էր, մինչդեռ մյուս խմբի մասնակիցներից հիվանդությունը հաջողվել էր հաղթահարել միայն 24 տոկոսին:
Մասնագետների կարծիքով՝ թերապեւտի հետ օնլայն շփումը, ի տարբերություն ավանդականի, նույնիսկ ավելի արդյունավետ կարող է լինել, քանզի օնլայն շփումը հաճախորդին իր վիճակը հասկանալու ավելի շատ հնարավորություններ է ընձեռում: Բացի այդ, չաթի նյութերը միշտ կարելի է վերընթերցել:
Հետեւաբար, անհրաժեշտություն է առաջանում թարմացնել հոգեթերապիայում կիրառվող մեթոդները, քանզի ինտերնետն արդեն ավելի մատչելի հոգեբանական խորհրդատվություն ստանալու հնարավորություն է ընձեռում:
