Սպորտ՝ նաեւ դատապարտյալների համար

ՀՀ սպորտի եւ երիտասարդության հարցերի նախարարության նախաձեռնությամբ եւ ՀՀ արդարադատության նախարարության աջակցությամբ երեկ «Աբովյան»\’ քրեակատարողական հիմնարկում անցկացվեց արդեն ավանդական դարձած մարզական մասսայական միջոցառում, որին մասնակցեցին քրեակատարողական հիմնարկի կին եւ անչափահաս դատապարտյալները: Ֆիզկուլտուրայի եւ սպորտի մասսայականացում, առողջ ապրելակերպի սերմանում: Դատապարտյալներն ուժերը չափեցին յոթ մարզաձեւերում՝ մինի ֆուտբոլ, սեղանի թենիս, վազք, հեռացատկ, վոլեյբոլ, բազկամարտ, շաշկի: ՀՀ սպորտի եւ երիտասարդության հարցերի նախարարության մասսայական սպորտի եւ ֆիզիկական դաստիարակության քաղաքականության վարչության պետ Եղիշ Դավթյանի գնահատմամբ՝ այսօրինակ միջոցառումներն արդեն ավանդական են դարձել ու սպասված են դատապարտյալների կողմից: Իրենց հերթին դատապարտյալներն առաջարկում են նման միջոցառումներ տարվա մեջ անցկացնել մի քանի անգամ: Նախաձեռնության հեղինակ գերատեսչության ներկայացուցիչներն էլ խոստանում են հարցն անպայման քննարկել, հետագայում ընդլայնելով միջոցառման ծավալները, հատկապես որ՝ մասնակիցների թիվն ու հետաքրքրությունը էապես մեծացել է: Մրցաշարի ավարտին լավագույն մասնակիցները պարգեւատրվեցին դիպլոմներով, գավաթներով ու մրցանակներով: