Այսօր ՀՀ վարչապետ Տիգրան Սարգսյանն այցելեց Երեւանի թատրոնի եւ կինոյի պետական ինստիտուտ, շրջայց կատարեց վերակառուցված եւ վերանորոգված լսարաններով, ծանոթացավ կատարված աշխատանքներին, որոնք իրականացվել են
ՀՀ կառավարության պահուստային ֆոնդից տրամադրված ավելի քան 41 մլն դրամով:
Ինչպես տեղեկացրեց ռեկտոր Արմեն Մազմանյանը, ստեղծվում են նոր ամբիոններ, մուլտիմեդիայի ֆակուլտետ, բացվել են նոր` հոսքային լսարաններ, փոխվել է 60-ից ավելի դուռ եւ պատուհան, գնվել տեխնիկա` կինոդահլիճներն աշխատեցնելու եւ ուսանողական պրակտիկա իրականացնելու համար: «Այսպես ասած` համալսարանը կարկատեցինք: Ամբողջը դեռ արված չէ, բայց գոյության մինիմումն ապահովելու համար առաջին փուլում արվեց այն, ինչ պետք էր»,- ասաց Արմեն Մազմանյանը: Նա հավաստիացրեց, որ կատարված աշխատանքները կօգնեն ինստիտուտի ուսանողների մասնակցությամբ առավել որակյալ ֆիլմեր ներկայացնել. «Պետությունն ու ազգն առանց մշակույթի գոյություն ունենալ չեն կարող. դա քննարկելի չէ: Արվեստը կարող է հասարակությանը նվիրել թեւեր, բայց միեւնույն ժամանակ` նաեւ սմբակներ»: Շրջայցից հետո վարչապետը դիտեց «Գարեգին Նժդեհ` Հայաստան եւ ճշմարտություն» ներկայացումը, որ բեմադրվել է բուհի ուսանողների ջանքերով:
ԼՈՒԻԶԱ ՍՈՒՔԻԱՍՅԱՆ
Կարդացեք նաև
