«Գործի առաջին իսկ օրվանից ներգրավված եմ եղել գործի քննությանը, բոլոր դրվագներին ծանոթ եմ: Թերի քննված դրվագներ գործով չկան: Բոլոր դրվագներով նորից թարմ աչքով, պարբերաբար ուսումնասիրում եմ ձեռք բերված ապացույցները, քննչական խմբի անդամներով նորից քննարկումներ եմ կազմակերպում, տարբեր կարծիքներ են հնչում եւ ըստ այդմ, պլանավորում ենք մեր անելիքները: Որեւէ դրվագ անտեսության չի մատնվել»,- Aravot.am-ի հետ զրույցում ասաց մարտի1-2-ի քրեական գործերով քննչական խմբի նոր ղեկավար Վաղինակ Ջանազյանը՝ պատասխանելով հարցին՝ քննչական խմբի նոր ղեկավար ունենալու առիթով հանրության սպասելիքները 10 անձանց սպանությունների բացահայտումների առիթով թարմացել են. կա՞ն գործում ուշադրության չարժանացած կամ մոռացության մատնված դրվագներ, որոնք կարող են լույս սփռել:
Ինչ վերաբերվում է ակնկալիքին, Ջանազյանը հավելեց. «Ինչ ասեմ, իմացեք, որ քննչական խումբն ինչպես աշխատել է, նույն ինտենսիվությամբ շարունակելու ենք աշխատել: Ցանկացած քննիչի երազանքն է իր վարույթում չբացահայտված հանցագործություններ չլինեն»:
Aravot.am-ի ճշտող հարցին՝ եթե չորս տարի ամեն ինչ արվել է լավագույնս եւ էական առաջընթաց չկա հանրության համար հետաքրքրություն ներկայացնեղ հարցերի՝ 10 անձանց սպանությունների մասով, հիմա Դուք ի՞նչ եք անելու, մեր զրուցակիցը վրդովվեց. «Ո՞նց չի արվել, էսքան դեպքեր են բացահայտվել, մարդկանց ենք դատի տվել, հանգամանքներ են բացահայտվել: Բա դրանք կատարած աշխատանքի արդյունք են, չէ՞: Առանց աշխատանքի ոնց կարային արդյունքի հասնել»:
Նելլի ԳՐԻԳՈՐՅԱՆ
