«Ես ցանկանում եմ Մյասնիկ Մալխասյանին հիշեցնել, որ ժամանակին ինքը եղել է ՀՀՇ անդամ, ԵԿՄ անդամ, ՀՀԿ անդամ, «Արդարություն» դաշինքով եղել է պատգամավոր, «Առաջ Հայաստան» լոզունգի տակ եղել է պատգամավոր, հիմա դարձել է ՀԱԿ անդամ: Ամեն մարդ իրավունք ունի ինքնուրույն մտածելու եւ կարծիք հայտնելու, բայց Մյասնիկ Մալխասյանը փորձում է իր անձն իմ անձի հետ համեմատել եւ մարդկանց շփոթության մեջ գցել, թե ով, որ իրավիճակում ինչ հայտարարություններ կանի»,- Aravot.am-ին ասաց Սուրեն Սիրունյանը` անրադառնալով մեր կայքին Մյասնիկ Մալխասյանի հայտնած այն կարծիքին, որ եթե իրավիճակ փոխվի` Սիրունյանն այլ բան կասի:
Հիշեցնենք, որ այս մեկնաբանությունը հնչեց Սիրունյանի այն հայտարարությունից հետո, որ ինքը պատրաստվում է ՄԻԵԴ-ից ետ վերցնել իր դիմումը: «Ես հայտարարել եմ, որ ետ եմ վերցնում իմ դիմումը ԵԴ–ից, քանի որ ունեմ ինքնուրույն որոշումներ կայացնելու իրավունք: Ոչ ոք ինձ հակառակը պարտադրել չի կարող, որեւէ հրապարակում ինձ վրա չի կարող ազդել: Եթե մարդիկ քաղաքական կուսակցությունները շփոթել են արոտավայրերի հետ… լավ է արոտավայրերով զբաղվեն, քան քաղաքականությամբ»:
Այսօր մամուլի ասուլիսում անդրադառնալով Սիրունյանի` ՄԻԵԴ-ից դիմումը ետ վերցնելու մտադրությանը, ՀԱԿ պետա-իրավական հանձնախմբի համակարգող, նախկին զինդատախազ Գագիկ Ջհանգիրյանն էլ հայտարարեց, որ եթե Սիրունյանը ետ վերցնի ՄԻԵԴ-ից իր դիմումը, ապա կդադարեն նրան համարել քաղբանտարկյալ: Ի պատասխան, Սիրունյանը մեր զրույցում հակադարձեց. «Գագիկի ասածից կարելի է հասկանալ մի բան` այն մարդիկ, ովքեր մարտի 1-ի քրեական գործերով հայտնվել են բանտերում եւ չեն դիմել ՄԻԵԴ` նրանք եւս քաղբանտարկյալ չեն: Ես շատ հպարտ կլինեմ, որ ապրեմ մի երկրում, որտեղ քաղբանտարկյալներ չլինեն: Ես ուրախ եմ, որ Ջհանգիրյանը որոշել է, որ ես դադարում եմ քաղբանտարկյալ լինել ու քանի որ արդեն ինքն է որոշում` ով է քաղբանտարկյալ, ով` ոչ, ինչպես զինդատախազ աշխատած ժամանակահատվածում կարողանում էր որոշել` ով է ինքնասպանություն գործել, ով` սպանվել, թող այդպես էլ շարունակի: Մարդիկ ինձ էլ են ճանաչում, Գագիկ Ջհանգիրյանին էլ, իմ գործողություններից էլ են տեղյակ, Ջհանգիրյանից էլ: Ես վստահ եմ, որ սեւազգեստ կանայք մեր բակում ցույց չեն անի, որ ես այլեւս քաղբանտարկյալ չեմ»:
Ինչ վերաբերում է ՀԱԿ-ի` քաղբանտարկյալների փաստաբաններին վճարել-չվճարելուն, Սիրունյանը ձեռնպահ մնաց այդ թեմայով խոսել, ասաց, որ ինքը երբեւէ նման հայտարարություն չի արել ու գերադասում է իրենց «կենցաղային հարցերին» չխառնվել: Բուն խնդրի վերաբերյալ միայն նկատեց. «Բա ՀԱԿ–ը կետք է վճարեր, հո ՀՀԿ–ն կամ ՀՅԴ–ն չպիտի վճարեր»:
Կարդացեք նաև
Նելլի ԳՐԻԳՈՐՅԱՆ
