Անցած ուրբաթ օրը կայացած քաղխորհրդի նիստում Հայ ազգային կոնգրեսը որոշում էր ընդունել, որ ՀԱԿ-ն առաջիկա խորհրդարանական ընտրություններին մասնակցելու է ՀԱԿ անդամ 18 կուսակցությունների եւ հասարակական-քաղաքական նախաձեռնությունների դաշինքով: Երեկ, մամուլի ասուլիսում, ՀԱԿ համակարգող Լեւոն Զուրաբյանն արդեն պաշտոնապես հրապարակեց ՀԱԿ քաղխորհրդի որոշումը:
Այս ամենում հետաքրքիրն այն է, որ ՀԱԿ անդամ 18 կուսակցությունների եւ հասարակական կազմակերպությունների ցանկում է նաեւ «Հայ կամավորականների շարժում» հասարակական-քաղաքական նախաձեռնությունը (), որի համակարգողն է Ժիրայր Սեֆիլյանը:
Aravot.am-ի հետ զրույցում, պատասխանելով հարցին՝ արդյոք մասնակցել են հիշյալ քաղխորհրդի նիստին եւ որոշման կայացմանը, Ժիրայր Սեֆիլյանն ասաց, որ իրենք վաղուց արդեն չեն մասնակցում ՀԱԿ-ի աշխատանքներին: Այդ դեպքում ինչո՞ւ են Կոնգրեսում շարունակում իրենց անունից եւս հանդես գալ, Սեֆիլյանը պատասխանեց. «Այդ հարցն իրենց ուղղեք»:
Այս առիթով Aravot.am-ը մեկնաբանություններ խնդրեց նաեւ ՀԱԿ համակարգող Լեւոն Զուրաբյանից: Վերջինս հստակեցրեց. «Այդ նախաձեռնության ստեղծման օրվանից Սամվել Հարությունյանը եղել է «Հայ կամավորական համախմբում» նախաձեռնության ներկայացուցիչը ՀԱԿ քաղխորհրդում, մշտապես մասնակցել է բոլոր նիստերին եւ տվել իր համաձայնությունը: Այնպես որ՝ հարց չի կարող լինել»: Դիտարկմանը՝ իրենք իրար մե՞ջ խնդիր ունեն, Զուրաբյանը հակադարձեց. «Այդ առումով ոչինչ ասել չեմ կարող»:
Կարդացեք նաև
Նելլի ԳՐԻԳՈՐՅԱՆ
