Ոստիկանության քննչական գլխավոր վարչության Կոտայքի մարզի քննչական բաժնում հարուցվել է քրեական գործ՝ ՀՀ քրօրի 258 հոդվածի 4-րդ մասի (խուլիգանություն, որի ժամանակ օգտագործվել է հրազեն) հատկանիշներով: Ինչպես Aravot.am-ին հայտնում է ֆոտոլրագրող Գագիկ Շամշյանը, հունվարի 21-ին ժամը, 20-ի սահմաններում Հրազդան քաղաքում, Դուրյան 6 շենքի դիմաց՝ «Նարինե Մելոյան» ԱՁ-ի մոտ Հրազդան քաղաքի բնակիչ՝ 43-ամյա Մանվել Մկրտչյանը իր մոտ եղած գազային ատրճանակով կրակոց է արձակել: Դեպքի վայրում ֆոտոլրագրողին պատմել են, որ մինչ այդ վիճաբանություն է տեղի ունեցել Մ. Մկրտչյանի եւ Հրազդան քաղաքի բնակիչ, 37-ամյա Արմեն Մելոյանի միջեւ, ինչից հետո էլ հնչել է կրակոցը:
Քննիչի որոշմամբ Մ. Մկրտչյանը ձերբակալվել է, հայտնաբերվել է նաեւ գազային ատրճանակը:
Հրազդանում ֆոտոլրագրողին պատմել են, որ Մ. Մկրտչյանն ունի խանութ եւ խանութի մի հատվածում այս պահին գործում է Հրազդանի քաղաքապետի թեկնածու Սասուն Միքայելյանի նախընտրական շտաբը:
