Չնայած՝ հանրային ծառայությունների ոլորտը բարեփոխելու համար մեծ գումարներ են ծախսվում
Պետական վարչարարությունը կատարելագործելու, հանրային ծառայությունները շարքային քաղաքացու համար հասանելի դարձնելու նպատակով եվրակառույցները եւ ՀՀ կառավարությունը մեր երկրում միլիոններ են ծախսում, սակայն ընդամենը մի քաղաքացու օրինակով կարելի է պատկերացում կազմել, թե այս ոլորտում դեռեւս որքան շատ անելիքներ կան:
76-ամյա Միշիկ Ենգիբարյանը, որը երկար տարիների աշխատանքից հետո պետք է անհոգ ծերություն վայելի, 5-6 ամիս է՝ ընկած է կադաստրի ու դատարանների դռները: Նրան ոչ մի կերպ չի հաջողվում իր տունը սեփականաշնորհել: Բայց ոչ այն պատճառով, որ տան հետ կապված խնդիրներ կան, այլ հարցն այն է, որ նրա անունը փաստաթղթերից մեկում ոչ իր, այլ պետական մարմնի մեղքով տառասխալով է գրվել: Այսինքն՝ փաստաթղթերից մեկում՝ գույքաթերթիկում, նրա անունը սխալ է գրված եղել:
Միշիկի փոխարեն, ինչպես որ գրված է անձնագրում, գույքաթերթիկում գրել են Միշա: Երբ տունը սեփականաշնորհելու համար Մ. Ենգիբարյանը Անշարժ գույքի կադաստրի պետական կոմիտեի Շենգավիթի բաժին է ներկայացրել պահանջվող փաստաթղթերը, արձանագրելով գույքաթերթիկի ու անձնագրի միջեւ անվան տարբերությունը, Շենգավիթի բաժնի պետը նրան հորդորել է ծննդականը հաստատել նոտարի կնիքով, որից հետո գործը գլուխ կգա. «Նախ նոտարը զարմացավ, որ կադաստրը նման պահանջ է դրել իմ առաջ, բայց կնքեց ծննդականս: Հետո նորից տարա կադաստր, բայց նորից մերժեցին ու ծննդականս էլ նոտարի կնիքով՝ հիմք չընդունեցին»:
Կարդացեք նաև
Անվանափոխության համար կադաստրը Միշիկ Ենգիբարյանին այս անգամ էլ հորդորել է դիմել դատարան: Այս անգամ էլ Մ. Ենգիբարյանին վստահեցրել են, որ միայն դատարանով անվանափոխված փաստաթուղթը հիմք կընդունեն: Պարոն Ենգիբարյանի ներկայացմամբ՝ կադաստրից խնդրել է իրեն վերադարձնել իր փաստաթղթերը, որպեսզի պատճենահանի եւ ներկայացնի դատարան, բայց կադաստրի աշխատակիցները, նրա խոսքերով, անգամ պատճենահանումն են «մեծ» պատմություն սարքել: Նախ՝ մերժել են փաստաթղթերը վերադարձնել՝ պատճառաբանելով, որ իրենք կպատճենահանեն ու կտան: «Բայց 1 հատ փաստաթղթի պատճենահանումը 10 օրից ավելի տեւեց»,- ասաց Մ. Ենգիբարյանը: Ըստ նրա՝ «Սկզբում խոստացան մի շաբաթից պատճենը պատրաստ կլինի՝ գնամ ստանամ: Մի շաբաթից էլ գնացի, ասացին՝ պատրաստ չի, 3 օրից գնացի, այս անգամ էլ պատճառաբանեցին, թե ընդմիջում է, չենք կարող տալ փաստաթուղթը: Մինչեւ աղմուկ չբարձրացրեցի՝ էդ մի կտոր թուղթը չտվեցին»:
Անհրաժեշտ փաստաթուղթը մի կերպ պոկելով կադաստրից՝ Միշիկ Ենգիբարյանը դիմում է դատարան: Նրան հայտնում են դատական նիստի օրը, նույնիսկ դատավճռի ստանալու օրը. «Դատավճռի մասին փաստաթուղթը վերցնելուց, դատավորին խնդրեցի ասի, թե ինչ է գրված եւ ինչ վճիռ է կայացրել, բայց հրաժարվեց, պատճառաբանելով՝ գնա իրավաբանի մոտ կբացատրեն»:
Սակայն առանց իրավաբանի բացատրության էլ Միշիկ Ենգիբարյանը վճիռը կարդալուց հետո հայտնաբերել է, որ դատարանը մերժել է ներկայացված փաստաթղթում անվանափոխություն կատարել:
Մ. Ենգիբարյանի խոսքերով՝ «Այս տարիքիս ընկել եմ դռնեդուռ եւ անհասկանալի պատճառներով մերժում են տունս սեփականաշնորհել, հատկապես որ՝ պետական մարմնի պատճառով է իմ անունը սխալ գրվել»:
ՆԵԼԼԻ ԲԱԲԱՅԱՆ
«Առավոտ» օրաթերթ
