ԲՀԿ անդամ Հրաչյա Ռոստոմյանը երեկ ՀՀ կառավարություն էր եկել։ Նա այսուհետ սպորտի եւ երիտասարդության նախարարն է եւ ըստ իր հայտարարության՝ անկուսակցական։ Բայց գնացեք Կենտրոն վարչական շրջան եւ հարցրեք, թե ով է եղել Հրաչյա Ռոստոմյանը 2010 թվականի հունվարի 10-ին թիվ 10 ընտրատարածքում մեծամասնական ընտրակարզով ԱԺ ընտրությունների ժամանակ։ Այն ժամանակ Հրաչյա Ռոստոմյանը «Ազգային միաբանություն» կուսակցության անդամ, ՀՀԿ-ի կողմից սատարվող պատգամավորի թեկնածու Արա Սիմոնյանի վստահված անձն էր Երեւանի թիվ 71 դպրոցում տեղակայված 10/18 տեղամասում։ Երեկ, երբ «ՀԺ» թղթակիցը նրանից հետաքրքրվել է, թե նա ինչ առնչություն է ունեցել 2010-ին թիվ 10 ընտրատարածքում անցկացված ընտրություններին, նախարարը պատասխանել է. «Ես այդ ժամանակ ԲՀԿ-ական եմ եղել, եւ այդ ժամանակ այդ ընտրատարածքում ոչ մեկի չենք սատարել եւ ոչ մի հետաքրքրություն չենք ունեցել։ Չգիտեմ՝ ինչ նկատի ունեք»։ Ռոստոմյանը կարող է ուշադիր զննել այս լուսանկարը, որում պատկերված է 2010-ի հունվարի 10-ին թիվ 71 դպրոցում տեղակայված 10/18 տեղամասում Արա Սիմոնյանի վստահված անձը՝ ընտրական փաստաթղթերի համար նախատեսված չհրկիզվող պահարանի կողքին։ Ընդ որում, նա այդ օրը սովորական վստահված անձ չէր։ Նա, ինչպես ասում են, անձամբ էր «ռուլիտ անում» այդ ընտրատեղամաս «ընտրող բերելու» գործընթացը։
«Հայկական ժամանակ»
