Երեւանի Նալբանդյանի եւ Արամի փողոցների խաչմերուկում, հունիսի 22-ի գիշերը, վթարի ենթարկվելու հետեւանքով թիվ 1 համալսարանական հիվանդանոցում վիրահատվելուց հետո Միքայելյանի անվան վիրաբուժության կենտրոն տեղափոխված պրոդյուսեր Գրիգոր Նազարյանը եւ հաղորդավար, շոումեն Մարկ Սաղաթելյանը հավանաբար 1,5-2 ամիս կմնան այնտեղ: Այս մասին NEWS.am-ի թղթակցի հետ զրույցում նշեց «Միքայելյան» վիրաբուժության ինստիտուտի փոխտնօրեն Օնիկ Մելքոնյանը:
Նա տեղեկացրեց, որ նրանք տեղավորվել են առանձին սենյակներում, այսպես կոչված, «VIP» պալատներում: Այժմ թե’ Մարկ Սաղաթելյանը, թե’ Գրիգոր Նազարյանը բուժում են ստանում` ոսկրերի կոտրվածքի հետ կապված: «Շինաներ է դրված, անշարժացրած է, իրենց բուժումը համապատասխան ստանում են, հանգիստ վիճակում են»,- ասաց Օնիկ Մելքոնյանը:
Նա նշեց, որ նրանք այնքան ժամանակ պետք է անշարժ մնան, մինչեւ ոսկրերը կպնեն, ինչը նշանակում է, որ առնվազն 1,5-2 ամիս կմնան հիվանդանոցում: Դրանից հետո նրանք կկարողանան քայլել, շարժվել եւ այլն:
Փոխտնօրենը նշեց, որ վիրահատություններ նախատեսված չեն: Օնիկ Մելքոնյանը երկու հիվանդների վիճակն էլ գնահատեց կայուն` նշելով, որ Մարկ Սաղաթելյանի կոտրվածքները ավելի բարդ են, քանի որ նա ունի նաեւ ողների կոտրվածք:
Կարդացեք նաև
Ավելի վաղ տեղեկացրել էինք, որ Երեւանի Նալբանդյանի եւ Արամի փողոցների խաչմերուկում հունիսի 22-ին՝ ժամը 01.35-ի սահմաններում վթարի էին ենթարկվել պրոդյուսեր Գրիգոր Նազարյանն ու եւ հաղորդավար, շոումեն Մարկ Սաղաթելյանը: Դեռեւս չպարզված հանգամանքներում բախվել էին «Оպել» մակնիշի 30 ՏԼ 173 համարանիշի եւ «Ֆոլքսվագեն» մակնիշի 14 ՏՕ 811 համարանիշի ավտոմեքենաները, ինչի հետեւանքով «Ֆոլքսվագեն»-ի վարորդ` 41-ամյա Գրիգոր Նազարյանը եւ ուղեւոր՝ 41-ամյա Մարկ Սաղաթելյանը տեղափոխվել էին թիվ 1 համալսարանական հիվանդանոց: Կլինիկայի բժիշկ Իրինա Մալխասյանը հայտնել էր, որ նրանք տեղափոխվել են հետտրավմատիկ շոկով, երկուսի մոտ էլ կան կոտրվածքներ` կոնքոսկրի, պարանոցի եւ ողերի: Գրիգոր Նազարյանի մոտ կան նաեւ ավելի բարդ կոտրվածքներ:
