Նոյեմբերի 1-ին՝ Ալեքսանդր Սպենդիարյանի ծննդյան 155-ամյակի օրը, մեծանուն կոմպոզիտորի անունը կրող Երևանի օպերայի և բալետի ազգային ակադեմիական թատրոնն առաջին անգամ հանդիսատեսի առջև բացեց իր նոր Փոքր համերգասրահի դռները։
Այս առիթով Օպերային թատրոնի տնօրենի խորհրդական Ռոնա Ահարոնյանը Aravot.am-ին փոխանցեց հետևյալը. «Նորաբաց համերգասրահը նախատեսված է կամերային համերգների, մանկական օպերային և բալետային ներկայացումների, ինչպես նաև մշակութային բազմաբնույթ միջոցառումների համար՝ դառնալով արվեստի և հանդիսատեսի հանդիպման նոր հարթակ։ Այն թատրոնի տնօրեն, մաեստրո Կարեն Դուրգարյանի տեսլականներից մեկն է, որը կոչված է դառնալու նոր մշակութային օջախ՝ արվեստագետների և հանդիսատեսի համար»։
Կարդացեք նաև
Իսկ բացման պաշտոնական համերգը վստահվել էր ՀՀ վաստակավոր արտիստ, դաշնակահար Հայկ Մելիքյանին։ Ծրագրում բարձրարվեստ կատարումներով հնչեցին Ալեքսանդր Սպենդիարյանի, Կոմիտասի, Արամ Խաչատրյանի, Ղազարոս Սարյանի, Ալեքսանդր Հարությունյանի և Առնո Բաբաջանյանի կոթողային ստեղծագործությունները։
Երեկոյի հատուկ հյուրն էր պարուհի Աննա Քալաշյանը, որը ներկայացրեց խորեոգրաֆիկ պրեմիերա՝ Սպենդիարյանի «Էնզելի»-ն՝ սեփական բեմադրությամբ ու կատարմամբ, բնականաբար՝ Հայկ Մելիքյանի դաշնամուրային ընկերակցությամբ։
Լեփ-լեցուն դահլիճում ներկա էին դիվանագիտական առաքելությունների ղեկավարներ ու ներկայացուցիչներ, ՀՀ գլխավոր դատախազը, մշակութային և երաժշտական հանրության բազմաթիվ դեմքեր։ Երեկոն դարձավ իսկապես պատմական պահ թատրոնի և հայաստանյան երաժշտական կյանքի համար։
Սամվել Դանիելյան
Լուսանկարները՝ Տիգրան Առաքելյանի
