«Մեկնարկած զորավարժությունները մեր ռազմաքաղաքական կյանքի կարեւորագույն իրադարձություններն են, դրանք բանակը պատրաստում են մեծ պատերազմի, իսկ պատերազմին դիմակայելու համար հարկավոր է լավ պատրաստվել»,- այսօր լրագրողների հետ հանդիպման ժամանակ ասաց ռազմական փորձագետ Դավիթ Ջամալյանը:
Անդրադառնալով նաեւ այն փաստին, որ լուրեր էին շրջանառվում, թե պատերազմի վտանգը կա, եւ մոբիլիզացնում են ռեզերվը` Ջամալյանը նշեց. «Խոսքը պլանային միջոցառումների մասին էր: Առաջնագծում ամեն ինչ նորմալ է: Պատերազմ չեղավ: Զորավարժությունների անցկացմամբ պետք է կանխել պատերազմը: Լավ է, որ այս տարի պարբերաբար նման զորավարժություններ էին լինում: Դա մեր բանակը պատրաստելու լավագույն միջոցն է: Մի քանի օրից էլ Արցախում կմեկնարկեն զորավարժություններ: Կարծում եմ հասարակությանը պետք է պատրաստել պատերազմի, նաեւ տեղեկատվական առումով, որովհետեւ անտեղյակությունը խուճապ է առաջացնում: Գրագետ ինֆորմացիոն քաղաքականության խնդիր կա: Կարծում եմ պաշտպանության նախարարությունը բանակի նույնիսկ ամենափոքր ձեռքբերում պետք է ի ցույց դնի հասարակությանը, մարդկանց մոտ վստահություն ներշնչելու համար»:
Ջամալյանի տեղեկացմամբ՝ բանակը համալրվել է տարբեր ֆունկցիաներ ունեցող սպառազինություններով, ժամանակակից տեխնիկայով: Ըստ նրա, եթե հակառակորդը փորձի ինչ-որ քայլեր անել, ապա նրան անակնկալ է սպասվում: Խոսելով Ստեփանակերտի օդանավակայանի վերաբերյալ Թուրքիայի հնչեցրած հայտարարությունների մասին` Ջամալյանը նշեց, որ այդպես էլ պետք է լիներ, այդ հայտարարությունները կանխատեսելի էին.«Ես չեմ կարծում, թե Թուրքիան կփակի իր օդային տարածքը, քանի որ մենք էլ ունենք որոշակի լծակներ, որովհետեւ մեր տարածքը տարանցիկ է: Այդ հայտարարությունները պետք է բարոյահոգեբանական հարթության մեջ դիտարկել: Եթե հանկարծ նրանք խոսքից գործի անցնեն, ապա մեր պատասխանը չի ուշանա: Իսկ Ադրբեջանին, մենք ցավոտ եւ տեղային բնույթի պատասխան տալու հնարավորություն ունենք»:
Կարդացեք նաև
Եվա ՀԱԿՈԲՅԱՆ
