ՀԱԿ ակտիվիստ Վարդգես Գասպարիի համոզմամբ, այսօր Աժ ՀՀԿ պատգամավոր Սամվել Ալեքսանյանի վերաբերյալ էթիկայի հանձնաժողովի որոշումը կսանձի պատգամավորների սանձարձակությունները: «Կարծում եմ՝ մասնակիորեն կազդի, որ պատգամավորները գոնե տեսախցիկի առաջ նմանատիպ սանձարձակություններ չանեն: Հիմա կարեւորը սա ընդհանրացնելն է, որ որեւէ պաշտոնյա, որեւէ քաղաքացու նկատմամբ, անկախ տեսախցիկի առկայությունից նմանատիպ արարք իրեն եւ իր թիկնապահներին, ենթականերին թույլ չտա»,- Aravot.am-ին ասաց պարոն Գասպարին: Ըստ նրա, ինքը հարցը հետապնդում է նաեւ քրեաիրավական հարթության մեջ ու շարունակելու է պայքարել օրենքի շրջանակներում.«Այժմ գործը գտնվում է Վճռաբեկ դատարանում, մենք շարունակելու ենք մեր պայքարը»:
Հիշեցնենք, որ այսօր ԱԺ-ում ՀԱԿ պատգամավոր եւ ԱԺ էթիկայի հանձնաժողովի նախագահ Նիկոլ Փաշինյանը հրապարակեց ՀՀԿ պատգամավոր Սամվել Ալեքսանյանի «դատավճիռ»՝ որոշումը՝ ՀԱԿ անդամ Վարդգես Գասպարիի հետ ունեցած միջադեպի առնչությամբ: Նիկոլ Փաշինյանի խոսքերով՝ «Դիմողի կամքին հակառակ թղթե պաստառը փախցնելը տվյալ իրավիճակում իրավաչափ քայլ չի եղել, պատգամավորը չի հարգել դիմողի՝ սեփական կարծիքն արտահայտելու մարդու Սահմանադրական իրավունքը եւ թույլ է տվել պատգամավորի էթիկայի կանոնների խախտում: Կանոնակարգի 24 հոդվածով ղեկավարվելով՝ հանձնաժողովը որոշել է՝ թիվ 7 ընտրատարածքից ընտրված պատգամավորը խախտել է օրենքը»
Արփինե ՍԻՄՈՆՅԱՆ
Կարդացեք նաև
