Երեկ երեկոյից մինչև այսօր Երևանի տարբեր հատվածներում հերթապահություն են իրականացնում բազմաթիվ ոստիկանական մեքենաներ և ավտոմատավոր ոստիկաններ:
Epress.am-ի թղթակիցը զինված ոստիկաններին նկատել է Դավթաշենի կամրջի մոտ, Զեյթունում, Կենտրոն համայնքում, Կիևյան փողոցի վրա, ինչպես նաև մարզերից Երևան մտնող ճանապարհներին: Մասնավորապես, Մասիսից Երևան մտնող ավտոճանապարին զինված ոստիկանները կանգնեցնում են մեքենաներն ու ստուգում բեռնախցիկները:
Еpress.am-ի թղթակցի հետ զրույցում ՀՀ Ոստիկանության մամուլի ծառայության աշխատակից Արմեն Մալխասյանն ասել է, որ պատճառը երեկ՝ փետրվարի 10-ին, Կոտայքի մարզում տեղի ունեցած ավազակային հարձակումն է։
Նշենք, որ երեկ՝ ժամը 19.15-ից 19.45-ն ընկած ժամանակահատվածում դիմակավորված և ինքնաձիգներով զինված 5 անձինք հարձակում են գործել Երևան-Սևան ճանապարհի 12-րդ կմ-ին գտնվող անվադողերի վերանորոգման կետին կից տանը, որտեղ կպչուն ժապավենով կապել են տանտիրուհու, նրա որդու, երկու հարսների ձեռքերը, ոտքերը և բերանը, հարվածներ են հասցրել որդու գլխին ու դեմքին, սպառնացել նրան և ընտանիքի անդամներին` պահանջելով ոսկյա զարդեր ու գումար, ապա հափշտակելով 9.000 դրամ՝ դիմել են փախուստի:
Կարդացեք նաև
Ոստիկանությունը քրեական գործ է հարուցել, կատարվում է նախաքննություն:
