«Ինձ հետաքրքրել է, թե ինչ կլինի, երբ գարունը չգա, ֆիլմս մարդու եւ բնության դիալոգ է, իսկ ներշնչաքի աղբյուրը՝ երաժշտությունը, ես լսում էի եւ զգում էի այդ երաժշտությունը»,-այսօր լրագրողների հետ հանդիպման ժամանակ «Ոսկե ծիրան» Երեւանի 10-րդ միջազգային կինոփառատոնում Միջազգային խաղարկային մրցույթ անվանակարգում ներկայացված իր «Հինգերորդ եղանակ» ֆիլմի մասին նշեց ռեժիսոր Ջեսիկա Վուդուորթը:
Ֆիլմում կա ձմեռ, երբ ծառերն սկսում են ընկնել, գարուն, երբ բնության շրջապտույտը խափանվում է, ամառ, երբ հուսահատությունը վնաս է հասցնում, աշուն, երբ հրեշտակներն են թեւածում:
Ռեժիսոր Մաչեյ Ադամեկի խոսքով՝ «Լուսանկարը» ֆիլմը իր առաջին խաղարկային ֆիլմն է, մինչ այդ նկարահանել է վավերագրական ֆիլմեր.
«Սյուժեի գաղափարը ինձ հետաքրքրեց, ոգեւորվեցի: Ես դրական եւ լուսավոր մարդ եմ, հետեւաբար ֆիլմս էլ է դրական, ֆիլմի սյուժեի համար օգտագործվել են բազմաթիվ գեղարվեստական հնարքներ, որպեսզի այն ավելի գեղարվեստականություն ստանա»:
Կարդացեք նաև
Ֆիլմում գլխավոր հերոս 16-ամյա Ադամը գտնում է իր մոր լուսանկարը, որտեղ վերջինս հղի է եւ երջանիկ մի անծանոթ տղամարդու կողքին: Նրա մեջ կասկածներ են առաջանում իրենց ընտանիքի վերաբերյալ, եւ նա սկսում է փնտրել իսկական հորը: Ադամը ճաշակում է իր առաջին սերը, հասու լինում իսկական ընկերությանը եւ, վերջապես, բացահայտում անցյալի գաղտնիքը:
Անժելա ՇԱՀՈՒՄՅԱՆ
