«Թամանյանի արձանի մոտ ինչ-որ անձինք (ենթադրում եմ Կասկադի սեփականատերերի հետ կապ ունեցող) «Մենք սատարում ենք Վարդան Պետրոսյանին» խմբի ակտիվիստներին արգելում են արդար դատաքննության պահանջով ստրագրահավաք անցկացնել: Նրանք պատճառաբանում են, թե «տարածքն իրենց սեփականություն է»,- այս մասին ահազանգում է «Ժառանգություն» կուսակցության քարտուղար Ստյոպա Սաֆարյանը:
Aravot.am-ի հետ զրույցում Ստյոպա Սաֆարյանը մանրամասնեց տեղի ունեցած միջադեպը. «Առավոտյան խմբի անդամները ինձ տեղյակ պահեցին, որ մի քանի համազգեստով տղա մոտեցել են իրենց եւ պահանջել այնտեղ չկանգնել: Ես ակտիվիստներին թողել էի իմ հեռախոսահամարն ու ասել, որ եթե իրենց անհանգստացնեն` զանգահարեն ինձ: Ժամեր անց զանգահարեցին ինձ ու ասացին, որ մոտեցել են իրենց, պահանջել են հանել պաստառը սյան վրայից, եւ հեռանալ տարածքից: Ես գնացի այնտեղ, պարզվեց, որ ակտիվիստներին մոտեցողներից մեկը, որը նաեւ ինքը խոստովանեց, Կասկադի պահպանության ծառայության տղաներից է եղել: Ես նրան բացատրեցի, հստակ նշելով, որ ինքը իրավունք չունի անգամ կանգնած մարդուն մոտենալ եւ անհանգստացնել, եթե չունի կասկածներ, մանավանդ, որ ակցիան տեղի չի ունենում Կասկադի բուն տարածքոմ եւ, որ դա զանգվածային միջոցառում չէ…»,- ասաց Ստոյոպա Սաֆարյանը, շարունակելով, որ որքան էլ այդ տարածքը 99 տարով տրված է «Կասկադի» տերերին` այնուամենայնիվ դա չի նշանակում, որ մարդիկ չեն կարող ազատ տեղաշարժվել, դա կապ չունի տարածքի սեփականության ձեւի հետ:
«Քանի որ այդ տղան պատասսխաններ չուներ իմ հարցերին եւ պահանջներին, խնդրեց մի փոքր սպասել, որպեսզի ծառայության պետը գա ինձ հետ զրուցելու: Ես սպասեցի, ու հենց այդ երիտասարդը լքեց տարածքը, իմ ձեռքի վրա զանգահարեց ծառայության պետը, մենք զրուցեցինք, ես բարեկամաբար հորդորեցի ձեռնպահ մնալ նման գործողություններից, վկայակոչեցի օրենքի պահանջներ, որոնց համաձայն նրանք իրավունք չունեն նման արգելքներ դնելու ոչ միայն իրենց տարածքում, այլեւ այդ տարածքից դուրս: Հորդորեցի չանհանգստացնել երիտասարդներին, որոնք բացառապես օրենքի շրջանակներում գործողություններ են կատարում: Այս ամենից հետո նա հարցրեց իմ կամքը, արդյոք կարող է իմ հեռախոսահամարը փոխանցել իրենց հանրային կապերի աշխատակցին, ես ասացի, որ պատրաստ եմ նույն բանը բացատրել նաեւ նրան»,- շարունակեց Ստյոպա Սաֆարյանը, տեղեկացնելով, որ միայն իր միջամտությունից հետո ցուցանակը նորից փակցվել է տեղում, եւ որ ինքը մեկ ժամ մնացել է այնտեղ:
«Ստորագրահավաքը շարունակվում էր, մարդիկ ինքնաբուխ, ինքնակամ հատուկ իջնում էին հենց այդ տարածք ստորագրություն թողնելու»,- հավելեց Ստյոպա Սաֆարյանը:
Կարդացեք նաև
Եվա ՀԱԿՈԲՅԱՆ
