«Այն, որ տուգանքներ են ներկայացվում մեքենաներով բողոքի երթ-ակցիայի մասնակիցներին, վկայում է այն մասին, որ այստեղ կա քաղաքական ենթատեքստ: Տարբեր ձևերով ու միջոցներով փորձում են կասեցնել այս՝ օր օրի աճող շարժումը»,-Aravot.am-ի հետ զրույցում, մեկնաբանելով այն փաստը, որ «Ընդդեմ կենսաթոշակային պարտադիր վճարների» նախաձեռնող խմբի կազմակերպած մեքենաներով բողոքի երթ-ակցիայի մասնակիցների նկատմամբ տուգանքի որոշ ակտեր են կազմվել, այսպիսի կարծիք հայտնեց «Ընդդեմ կենսաթոշակային պարտադիր վճարների» նախաձեռնության հետ համատեղ պայքարող «Ստոպ» նախաձեռնության անդամ, ՀՅԴ Նիկոլ Աղբալյան միության ատենապետ Գերասիմ Վարդանյանը:
Հիշեցնենք, որ «Ընդդեմ կենսաթոշակային պարտադիր վճարների» նախաձեռնող խումբը հայտարարություն է տարածել, որում նշվում է, որ կենսաթոշակային պարտադիր վճարների դեմ մեքենաներով բողոքի երթ-ակցիայից հետո, որը տեղի էր ունեցել դեկտեմբերի 5-ին, տուգանքի որոշ ակտեր են կազմվել երթի որոշ մասնակիցների նկատմամբ՝ ազդանշանների և երթևեկության կանոնները խախտելու համար։ Մասնավորապես նախաձեռնող խմբից տեղեկացնում են, որ ակցիայի մասնակիցներից մեկի տուն են այցելել ճանապարհային ոստիկանությունից և ակտ ներկայացրել, որ նա դեկտեմբերի 5-ին Հանրապետության հրապարակում խախտում է արել:
Խմբի հաղորդագրությամբ բոլոր մասնակիցներին, տուգանքի ակտեր ստանալու դեպքում, հորդորում են պարտադիր կերպով տեղեկացնել, գրելով՝ [email protected] էլ. հասցեին:
Գերասիմ Վարդանյանը տուգանքների կապակցությամբ նկատեց. «Օրինակ՝ Հանրապետության հրապարակում բազում հարսանիքներ են լինում, նույն կերպ Հրապարակի շուրջ պտտվում, բայց չեն տուգանում, այնինչ սրա համար տուգանում են»:
Կարդացեք նաև
«Դեմ եմ պարտադիր կուտակային կենսաթոշակային» նախաձեռնող խմբի անդամ Հայկ Ավետիսյանը մեզ հետ զրույցում նշեց, որ հաստատ որևէ դեպքի մասին խոսել չի կարող ու մանրամասնեց. «Մենք այդ հայտարարությունը համենայն դեպս ենք դրել, որ մարդիկ իմանան, որ եթե մի բան էլ լինի, մի տուգանք էլ գա, ապա թիմով ենք փակելու: Իսկ հայտարարության հետ կապված մանրամասները պետք է ճշտվեն, խնդրել ենք, որ ակտը, եթե լինի, մեզ ցույց տան»:
Տաթև ՀԱՐՈՒԹՅՈՒՆՅԱՆ
