Այսօր Վանաձորի պետական մանկավարժական ինստիտուտի Բանասիրական ֆակուլտետի Լրագրության բաժնի 2-րդ կուրսի ուսանողները կենսաթոշակային նոր համակարգի ներդրման վերաբերյալ բանավեճ էին կազմակերպել:
2014 թվականի հունվարի 1-ից 1974 թվականից հետո ծնված ՀՀ քաղաքացիները իրենց աշխատավարձից 5% պետք է հատկացնեն հատուկ կենսաթոշակային ֆոնդերին, կառավարությունն էլ իր կողմից է 5% ներդնում, սակայն 25 հազ. դրամից ոչ ավելի:
«Ժողովուրդը իրազեկվածության պակաս ունի, մեր հարցումները ցույց տվեցին, որ մարդիկ առանց իմանալու` ինչ է պարտադիր կուտակային կենսաթոշակային համակարգը, դեմ են դրան: Բանավեճի նպատակը այս ամենի մասին իրազեկել, տեղեկացնելն է»,-Aravot.am-ի հետ զրույցում ասում է բանավեճի կազմակերպիչներից Հեղինե Մկրտչյանը:
Նա նշում է, որ մարդիկ մեծամասամբ դեմ են նոր համակարգին, քանի որ վստահություն չունեն կառավարության հանդեպ:
Կարդացեք նաև
«Մարդիկ չգիտեն, վստահ չեն` իրենց գումարները վերադարձվելու են, թե ոչ: Նորմալ է, երբ մարդը իր համար կենսաթոշակ է ապահովում, եթե, իհարկե, վստահություն ունի երեւույթի հանդեպ: Հայաստանում, սակայն, այդ վստահությունը չկա»,-եզրափակում է Հեղինե Մկրտչյանը:
Անուշ ԲՈՒԼՂԱԴԱՐՅԱՆ
