Ուկրաինացի լրագրող Սերգեյ Լեշչենկոն հորդորել է ԱՄՆ-ի կառավարությունը ծանրութեթև անել Ուկրաինայի իշխանությունների նկատմամբ պատժամիջոցների սահմանումը՝ հիմնավորելով իր կոչն այն հանգամանքով, որ երկրի իշխանությունները փորձում են վերահսկողություն հաստատել ԶԼՄ-ների նկատմամբ:
«Վաշինգտոն Փոստ» ամերիկյան պարբերականում հրապարակված հոդվածում «Ուկրաինական պրավդա» պարբերականի գլխավոր խմբագրի տեղակալը մատնանշել է «Ֆորբս» հանրահայտ հանդեսի հետ Ուկրաինայում ստեղծված իրավիճակը:
Լեշչենկոյի համաձայն, «Ֆորբս»-ի Ուկրաինայում լույս տեսնող տարբերակը վերջերս գնել է 28-ամյա բիզնեսմեն Սերգեյ Կուրչենկոն, որը, ըստ էության, վայելում է Ուկրաինայի նախագահ Վիկտոր Յանուկովիչի որդի Ալեքսանդր Յանուկովիչի աջակցությունը:
«Ուկրաինական պրավդա» պարբերականի գլխավոր խմբագրի տեղակալի համաձայն, «Ֆորբս»-ի Ուկրաինայում լույս տեսնող տարբերակի խմբագրությունից նոյեմբեր ամսին աշխատանքից ազատվելու դիմում է ներկայացրել 14 լրագրող՝ այս կերպ արտահայտելով իրենց բողոքը պարբերականում հաստատված գրաքննության դեմ:
Կարդացեք նաև
«Ամերիկացի հրատարակիչները, որոնք գործընկերություն են հաստատել Ուկրաինայի հրատարակիչների հետ, պետք է հետամուտ լինեն ԶԼՄ-ների անկախության և խոսքի ազատության սկզբունքներին, քանի որ այս սկզբունքները հիմնարար նշանակություն ունեն իրական ժողովրդավարության կառուցման և պահպանման համար», – գրում է Լեշչենկոն՝ հավելելով. «Օրինակ, «Ֆորբս»-ը չպետք է թույլ տա օգտագործել իր անունը՝ Յանուկովիչի ընտանիքի համբավը բարելավելու նպատակով: «Ֆորբս»-ը կարող էր հետ կանչել Ուկրաինայի իր գործընկերներին տված արտոնագիրը»:
Մանրամասները՝ «Ամերիկայի ձայն»-ի կայքում
