Փետրվարի 12-ին «Ազդակ» մամուլի ակումբի հյուրն էր «Լև Գրուպ» իրավաբանական ընկերության նախագահ Լևոն Բաղդասարյանը: Հանդիպումը սկսվեց անակնկալով. ԱԺ պատգամավոր, «Իրավունք Մեդիա» ՍՊԸ գլխավոր տնօրեն Հայկ Բաբուխանյանը նրան հանձնեց պատվոգիր: «Մեր երկրում մամուլի ազատությունը, մեր ժողովրդավարական իրավունքները պաշտպանելու, 2013թ.-ին «Կյանքի խոսք» տոտալիտար աղանդին Հայաստանի բոլոր մակարդակի դատական ատյաններում ջախջախիչ պարտության մատնելու, բացի դրանից, Հայաստանում անվճար իրավաբանական պրակտիկա կատարելու համար պարոն Բաղդասարյանին տրվում է պատվոգիր՝ 2013թ.-ին ՀՀ իրավական ոլորտում լավագույն գործիչ ճանաչվելու կապակցությամբ»,- ասաց պրն Բաբուխանյանը:
Պրն Բաղդասարյանը շնորհակալություն հայտնեց և նշեց, որ հաճելի է լրատվամիջոցից ստանալ նման գնահատական:
Այնուհետև սկսեց խոսել ՀՀ դատական համակարգի մասին: «Նախ ասեմ, որ դժգոհությունները ոչ միայն դատական համակարգից են, այլ ընդհանուր կյանքից: Բոլորը բողոքում են բոլորից: Դրա մեջ կան և′ օբյեկտիվ, և′ սուբյեկտիվ պատճառներ: Ինչ վերաբերում է դատական համակարգին, ապա միանշանակ կա սուբյեկտիվ պատճառ: Նման դեպքում ես միշտ համեմատական եմ ներկայացնում 10 տարի առաջ և հիմա, 20 տարի առաջ և հիմա: Միանշանակ վստահեցնում եմ, որ տարբերություն կա դրական առումով: Բազմիցս անարդար դեպքերի են ականատես լինում, և պատճառը ոչ միայն դատական համակարգն է, այլև եղած սիստեմը»:
Նա նշեց, որ իր համար սկզբունք է որդեգրել՝ «Իրավունքը գիտություն է բարու և արդարի մասին», որով էլ փորձում է շարժվել:
Կարդացեք նաև
Վարդուհի ԲԱԼՅԱՆ
