Այսօր՝ մարտի 10-ին, Հայաստանի երիտասարդական հիմնադրամում տեղի ունեցավ հանդիպում հիմնադրամի հոգաբարձուների խորհրդի համակարգող Կարեն Ավագյանի հետ: Հանդիպման ընթացքում նա անդրադարձավ ՀՀ նախագահի հովանու ներքո իրականացվող երիտասարդ գիտնականների աջակցման ծրագրին, ՀՀ կառավարության աջակցությամբ Հայաստանի երիտասարդական հիմնադրամի կողմից հայտարարված կրթաթոշակի մրցույթի արդյունքներին և ՀՀ նախագահի աշխատակազմի կողմից հատկացվող դրամաշնորհների մրցույթին:
«Այսօր երիտասարդ գիտնականները 200 միլիոն դրամի միջոցով հնարավորություն ունեն հոգալ իրենց գործուղումների, սեմինարների, կոնֆերանսների, մրցանակաբաշխության ծախսերը: Այս ծրագրի շրջանակներում 700 գիտնական հնարավորություն է ունեցել օգտվել աջակցման ծրագրից: Կանգ չենք առել, առաջ ենք գնացել և այսօր մտածում ենք երիտասարդ գիտնականներին որոշակի նյութատեխնիկական հնարավորություններ տալ, այսինքն՝ գումարներ կծախսվեն համապատասխան սարքավորումներ ձեռք բերելու, գիտական հոդվածներ տպագրելու և միջազգային փոխհարաբերություններ կառուցելու համար»,- ասաց պրն Ավագյանը:
Նա նաև նշեց, որ գործուղման ծախսերը մեծ տոկոս են կազմում, և նախաձեռնող խումբը որոշել է, որ այսուհետ գործուղումներ կունենան այն գիտնականները, որոնք կունենան գիտական հոդված միջազգային ամսագրերում:
Պրն Ավագյանը այնուհետև խոսեց ՀՀ կառավարության աջակցությամբ Հայաստանի երիտասարդական հիմնադրամի կողմից հայտարարված կրթաթոշակի մրցույթի արդյունքների մասին: Նա նշեց, որ այս տարի մրցույթին դիմել են մոտ 1500 ուսանող, որոնցից ընտրվել են 780 ուսանող: Կառավարությունը հիմնադրամին հատկացրել է 60 միլիոն դրամ: «2011 թվ.-ից առ այսօր ավելի քան 2150 ուսանող ստացել են կրթաթոշակներ: Որոշողները մենք չենք, թե ովքեր են ստանալու, որոշողները այն փաստաթղթերն են, որոնք իրենք ներկայացնում են»,- ասաց պրն Ավագյանը:
Կարդացեք նաև
ՀՀ նախագահի աշխատակազմի կողմից հատկացվող դրամաշնորհների մրցույթի մասին խոսելիս՝ պրն Ավագյանը նշեց, որ այս տարի մրցույթին հայտ են ներկայացրել 86 հասարակական կազմակերպություններ: Ընդհանուր ֆոնդը կազմում է 200 միլիոն դրամ, որից 100 միլիոնը տրամադրվելու է ծխելու դեմ պայքար իրականացնող ծրագրերին: Այն հարցին, թե ինչու է ֆոնդի կեսը տրամադրվում այս խնդրին, արդյոք չկա՞ն այլ ավելի լուրջ խնդիրներ, պրն Ավագյանն ասաց. «Մենք չենք որոշում՝ ինչքան գումար տրամադրել: Մենք անցկացնում ենք մրցույթը»:
Պրն Ավագյանը խոսեց նաև նոր ծրագրերից: Նա ասաց, որ 2014 թվ.-ի սեպտեմբերից 2 և ավելի երեխա ուսանողների ուսման վարձերը կփոխհատուցվեն ամբողջությամբ:
Վարդուհի ԲԱԼՅԱՆ
