Կարապետ Առաքելյանը Հայոց ցեղասպանության ճանաչման յուրօրինակ ձեւ է մտածել: Պատկառելի տարիքով այս մարդը, որը ներկայացավ որպես «Հայ ժողովրդի փրկության կոմիտեի» նախագահ, նամակներ է պատրաստում եւ ուղարկում տարբեր երկրների ղեկավարներին ու ազդեցիկ գործիչներին: Թուրքիայի նախագահին էլ է ուղարկել: Միայն մի խնդիր ունի, աջակցություն է խնդրում այդ նամակները կոնկրետ լեզուներով թարգմանելու համար, որովհետեւ դրանք հայերեն են: Առաքելյանը իր ծավալուն նամակներում փաստեր է բերում 1876-1921թթ. Թուրքիայի կողմից իրականացված գործողությունների վերաբերյալ եւ պահանջում, որ իրականությանը չհամապատասխանելու դեպքում հերքեն այդ փաստերը, եւ եթե անհերքելի են, ուրեմն հզորները ճանաչեն Հայոց ցեղասպանությունը:
Կարապետ Առաքելյանն «Առավոտին» պատմեց, որ նամակների «հայաստանյան» շարք էլ ունի՝ ուղարկել է ՀՀ նախագահին, սփյուռքի եւ արտաքին գործերի նախարարներին, որոշ պատգամավորների: Իհարկե՝ աջակցության ակնկալիքով: Հույս ունի, որ դրանք անպատասխան չեն մնա: Նա հավաստիացնում է, որ Ղարաբաղյան շարժման ժամանակ էլ է ակտիվ եղել, թեեւ իր ձեւակերպմամբ՝ իրեն «պետական նշանակություն չեն տվել»:
«1990թ. հունիսի 3-ին Ղարաբաղյան հարցով Մոսկվայի համագումարը մնաց զարմացած, որովհետեւ Կրեմլի բակում մի բացօթյա համագումար էլ մենք արեցինք, մինչեւ հունիսի 11-ն այդտեղ եմ եղել, կոչեր ենք արել, թռուցիկներ տարածել: Ալեքսանդր Արզումանյանը, որ հիմա պատգամավոր է, կհիշի դա: Թռուցիկներում ասում էինք, որ պետք է կանխել Աֆղանստանի վերածված Հարավային Կովկասի արյունահեղությունը: Մի պրոֆեսոր էլ կար՝ Հրանտ Եպիսկոպոսյանը: Անընդհատ զգուշացնում էր, թե ինձ կկալանավորեն, նույնը ասում էր նաեւ Գալինա Ստարովոյտովան, բայց մենք պայքարում էինք: Իմիջիայլոց, Եպիսկոպոսյանն ինձ օգնեց, որ «Ղարաբաղի տեսարժան վայրերը» գիրքը փոխանցեմ Բորիս Ելցինին… Ի՜նչ տարիներ էին…»,- հուզվել էր մեր զրուցակիցը: Նա հավելեց, որ փիլիսոփայական գիտությունների դոկտոր, պրոֆեսոր Եպիսկոպոսյանն Արցախյան շարժման տարիներին Մոսկվայում կազմակերպել է Շարժման ակտիվիստների հանդիպումները կուսակցական, պետական աշխատողների հետ, ելույթներով հիմնավորել է Հայաստանի Հանրապետության հետ Արցախի, Գարդմանքի եւ Նախիջեւանի վերամիավորման հիմնախնդիրները։ Ինչ վերաբերում է Ստարովոյտովային, նա դեռեւս 1988-ին արտահայտվել էր հօգուտ Լեռնային Ղարաբաղի ինքնորոշման: Ստարովոյտովան բարձրաձայնում էր Արցախի՝ որպես անկախ պետական կազմավորման ստեղծման անհրաժեշտության մասին:
ԳՈՀԱՐ ՀԱԿՈԲՅԱՆ
Լուսանկարում` Կարապետ Առաքելյանը Ցեղասպանության
ճանաչման՝ իր եղանակն է մշակել:
«Առավոտ» օրաթերթ
18.06.2014
