Հայկական կաթը սպիտակ ոսկի է
«Մեզ չհաջողվեց ասոցիացիաներ կազմակերպել: Հայը ասոցացվող ազգ չի, նա կոլեկտիվ աշխատել չի սիրում: Լավագույն դեպքում խոպան գնան, միասին մի քիչ աշխատեն եւ ցրվեն»,-այսօր «Երկու երես» մամուլի ակումբում ասաց սոցիոլոգ Ահարոն Ադիբեկյանը՝ վստահեցնելով, որ եթե պետությունն աջակցի կաթնարտադրությամբ զբաղվող ընկերություններին, միավորի եւ խթանի պանիր արտադրող գործարաններին ու էժան վարկեր տրամադրի, ապա կաթը կարող է դառնալ սպիտակ ոսկի: Պարոն Ադիբեկյանը համոզված է, որ «Էմենտալ» տեսակի, հորած եւ թել պանիրները արտասահմանում մեծ պահանջարկ կարող են ունենալ, եթե համապատասխանեն սահմանված չափանիշներին: Ըստ նրա, խորհրդային տարիներին արտադրվող «էմենտալ»-ը, որը պանիրներից ամենաթանկն է եղել, քանի որ այս պանիրի մեկ կիլոգրամն արտադրելու համար պահանջվում է 20 կիլոգրամ կաթ եւ հատուկ տեխնոլոգիա, արտերկրում կիլոգրամը 50 դոլարով կվաճառվի: Խորհրդային տարիներին «Էմենտալ» պանիրն արտադրվել է կոլխոզներում եւ հասարակարգի փոփոխման պատճառով, պանրի արտադրության այդ տեխնոլոգիաները, ավիրվել են:
Սոցիոլոգը նաեւ վստահ է, որ հայերը վրացիներից էլ լավ «Սուլուգունի» կպատրաստեն եւ հենց Վրաստանում էլ կարող ենք իրացնել այդ պանիրը:
Ընդհանրապես, պարոն Ադիբեկյանը գտնում է, որ պետությունը պետք է լիցենզավորի եւ ապահովագրի գյուղատնտեսությունը: Իսկ ապահովագրությունով գյուղացիները պետք է պարտավորվեն, որ որակյալ, առողջ, արտադրանք պետք է տան:
Կարդացեք նաև
Բացի այդ, ըստ սոցիոլոգի, պետությունը պետք է միջամտի գյուղատնտեսական ապրանքների, մասնավորապես՝ կաթի գների կարգավորմանը:
Գյուղացին այսօր ոռոգման ջրի խնդիր էլ ունի: Ըստ նրա, զարգացած երկրները վաղուց լուծել են այդ հարցն՝ անցնելով կաթիլային եղանակով ոռոգմանը, որը քիչ ծախսատար է եւ արդյունավետ:
Aravot.am-ի հարցին, թե, կարելի՞ է ենթադրել, որ պետությունը գյուղացու հիմքային հարցերը չի լուծում, պարոն Ադիբեկյանն ասաց՝ այո, պետությունը միայն պարարտնյութ, սերմացու եւ վառելիք է տալիս, ինչը ճիշտ չէ:
Լուսինե ԲՈՒԴԱՂՅԱՆ
