Գերմանիայի «Քրիստոնեադեմոկրատական» կուսակցության պատգամավոր, արտաքին հարաբերությունների հանձնաժողովի անդամ Մանֆրեդ Գրունդը վերջերս է վերադարձել Լեռնային Ղարաբաղից: Այս մասին Բեռլինում նա խոսեց Հայաստանի, Ադրբեջանի, Վրաստանի եւ Ռուսաստանի լրագրողների հետ հանդիպման ժամանակ:
Խոստովանեց, որ ադրբեջանական «սեւ ցուցակի մասին» նախօրոք է իմացել, նշեց՝ քանի որ Գերմանիան ԵԱՀԿ Մինսկի խմբի անդամ չէ, ինքը տարածաշրջանի խնդրի մասին այնքան էլ տեղեկացված չէ, եւ իրավիճակը քննադատելու համար է ցանկացել այցելել Լեռնային Ղարաբաղ:
«Ես հույս ունեմ, որ բանակցային միջոցով հարցի կարգավորումը իրականություն կդառնա, եւ այդ հատվածում կբացառվի ռազմական հակամարտությունը: Եվ ես վախենում եմ, որ ինչ-որ մեկն օգտագործում է Սիրիայի եւ Ուկրաինայի հակամարտության ֆոնի վրա այս գործընթացին բացասական լուծում տալու համար: Լուծումներից մեկը կարող է այն լինել, որ Ադրբեջանը հետ կստանա օկուպացված տարածքները եւ մյուս ուղղությունն էլ այն է, որ Ադրբեջանը պետք է ճանաչի այդ տարածաշրջանի ինքնավարությունը,- ասաց Բունդեսթագի պատգամավորը՝ ավելացնելով, որ ներկա դրությամբ հակամարտության խաղաղ կարգավորման հանգուցալուծում չի նկատվում, քանի որ Ադրբեջանը հսկայական ներդրումներ է կատարում սպառազինություն ձեռք բերելու համար, «Հայաստանն էլ Ռուսաստանի բանտարկյալն է»:
Պարոն Գրունդը խոստովանեց. «Մինչեւ Ղարաբաղ գնալը ես գիտեի «սեւ ցուցակի» մասին եւ հույս ունեմ, որ որոշ ժամանակ անց ինձ հնարավորություն կընձեռվի կրկին այցելել Ադրբեջան»:
Կարդացեք նաև
Նա նշեց, որ երեք-չորս անգամ եղել է արդեն Ադրբեջանում, իսկ այս անգամ գնալուց առաջ այդ մասին հայտնել է Գերմանիայում Ադրբեջանի դեսպանին, որը պատասխանել է մեղադրանքներով:
«Ես ասացի Ղարաբաղ մեկնելու իմ մտադրության մասին եւ նաեւ տեղեկացրի, որ ես Բունդեսթագում ընտրված ազատ պատգամավոր եմ, որն իրավունք ունի գնալ որտեղ ցանկանում է եւ որեւէ մեկին այդ մասին չհարցնի»:
Նշենք, որ հանդիպումը տեղի է ունեցել «Taz.panterstifung» հիմնադրամի կողմից կազմակերպված սեմինարի շրջանակներում Գերմանիայի մայրաքաղաք Բեռլինում:
Հռիփսիմե ՀՈՎՀԱՆՆԻՍՅԱՆ
Բեռլին
