Այսօր, հազարավոր առեւտրականներ կառավարության շենքի առաջ, ինչպես իրենք որակեցին, «ամոթանքի ակցիա» էին անցկացնում: Նախորդ բողոքի ակցիային, որը տեղի էր ունեցել երկու օր առաջ, վարչապետ Հովիկ Աբրահամյանի՝ տոնավաճառների աշխատակիցներին տված պարզաբանումները չէին բավարարել, այդ պատճառով այսօր որոշել էին իրենց ակցիայում վարչապետին ամոթանք տալ:
Ցուցարարները վանկարկում էին՝ «Հովիկ իջիր»,«ամոթ», «մենք չենք ուզում հեռանալ մեր երկրից»:
Հանրահավաքի մասնակիցները, որոնք նաեւ տարբեր մարզերի առեւտրականներ էին՝ «կարմիր քարտ» ցույց տվեցին կառավարության պատասխանատուներին:
Բողոքի ակցիան հսկում էին մի խումբ ոստիկաններ: Ակցիայի մասնակիցներին հատկապես վիրավորել էր այն, որ նախորդ օրն իրենց դեմ հատուկ ջոկատայիններին էին հանել:
Փոքր եւ միջին ձեռներեցները կառավարությունից պահանջում են վերանայել Շրջանառության հարկի օրենքը, մինչ այդ օրենքի գործունեությունը կասեցնել եւ քննարկել շահագրգիռ անձանց հետ, որից հետո միայն կիրառել:
Կարդացեք նաև
Փոխոստիկանապետ Վալերի Օսիպյանի հետ բանակցելուց հետո Փոքր ձեռներեցությամբ զբաղվողների հայկական միության նախագահ Սպարտակ Ասլանյանը հանրահավաքի մասնակիցներին կոչ արեց հեռանալ՝ սեպտեմբերի 30-ին ժամը 6-ին լինելու պայմանով:
Ըստ նրա, այդ օրը ձեռներեցների միությունը հրավիրում է հանրահավաք, որտեղ կբարձրացնեն Շրջանառության հարկին վերաբերող խնդիրներն ու առեւտրականների բողոքները:
Ակցիայի մասնակիցները սուլոցներով հրաժարվեցին հեռանալ՝ պահանջելով՝ «հենց հիմի իրենց պատասխան տալ»:
«Մենք չենք հանգստանալու պայքարելու ենք մինչեւ վերջ»,-ասում էին հանրահավաքի մասնակիցները:
Այդ ընթացքում, երբ կառավարության շենքի առաջ բողոքի ակցիա էր տեղի ունենում, կառավարությունում վարչապետ Հովիկ Աբրահամյանը կառավարության նիստն էր անցկացնում:
Լուսինե ԲՈՒԴԱՂՅԱՆ
