Հայաստանում մարտի 16-18-ը տեղի է ունենում Եվրանեսթ խորհրդարանական վեհաժողովը: Չնայած՝ Ադրբեջանի քաղհասարակության ներկայացուցիչները հայտարարել էին, որ գալու են Հայաստան, բայց այնուամենայնիվ, չէին եկել: Նշենք՝ 2012 թվականին Եվրանեսթի նախորդ լիագումար նիստին, որը տեղի է ունեցել Բաքվում, Հայաստանի պատվիրակությունը մասնակցել է:
Այս մասին Aravot.am-ը զրուցեց Երեւանի մամուլի ակումբի նախագահ Բորիս Նավասարդյանի հետ: Նա նկատեց, որ Ադրբեջանը, ինչպես միշտ, հրաժարվում է այն պաշտոնական միջոցառումներին մասնակցել, որոնք իրականացվում են Հայաստանում. «Իրավիճակում գլուխ հանող բոլոր մարդիկ հասկանում են, որ ադրբեջանական պատվիրակությունը չի գալու Երեւան: Դա ի սկզբանե հասկանալի էր»:
Պարոն Նավասարդյանը նկատեց, որ չնայած այն հանգամանքին, որ Ադրբեջանում հակահայկական տրամադրությունը ավելի սուր է արտահայտվում, քան Հայաստանում՝ հակաադրբեջանական տրամադրությունները, Հայաստանի պատվիրակությունը գնացել էր Ադրբեջան, եւ Ադրբեջանի ներկայացուցիչները երբեւէ Հայաստանում չեն հանդիպել որեւէ սպառնալիքների. «Հիմնական պատճառը պետք է այլ տեղ գտնել: Ադրբեջանը շահագրգռված չէ որեւէ օրինակներ ունենալ Հայաստանի հետ նորմալ հարաբերություններ ունենալու համար, քանի որ համարում է, որ հարաբերությունների նորմալացումը միայն իրենց պատկերացրած ղարաբաղյան խնդրի լուծման պայմաններում կարող է լինել»:
Ամի ՉԻՉԱԿՅԱՆ
