Լուսանկարում մեր երկիրն արտաքին աշխարհի հետ կապող ամենակարեւոր ճանապարհներից մեկն է, այն քարտեզներում նշված է որպես Մ1, որը նշանակում է առաջին միջպետական ճանապարհ: Սակայն տրանսպորտի ու կապի նախարարության ենթակայության տակ գտնվող Երեւան-Գյումրի-Վրաստանի սահման տանող ճանապարհի՝ Աշոցքի տարածաշրջանի հատվածը (այն ներառում է Թորոս գյուղից մինչեւ Բավրայի անցակետ, կազմում է 30,2 կիլոմետր) աննկարագրելի վիճակում է՝ ավերակ ու քարուքանդ: Այս ճանապարհի վատ լինելն ավելի ակնառու է դառնում հարակից Վրաստանի դրախտային ճանապարհների ֆոնին:
Իսկ բեռնափոխադրումների 30 տոկոսը իրականացվում է հենց այս ճանապարհով: Չնայած այս կարեւորությանը՝ ճանապարհը տարիներ շարունակ համառորեն կապիտալ վերանորոգման չի ենթարկվում: Թեեւ տրանսպորտի ու կապի նախարար Գագիկ Բեգլարյանին, այս ճանապարհով «պտույտ մը» կազմակերպելուց հետո, հաջողվել է 2015թ.-ի պետական բյուջեից 13,5 կիլոմետրի անցանելիությունն ապահովելու համար 200 միլիոն դրամ գումար հատկացնել տալ, սակայն՝ ընդամենը փոսալցման նպատակով: Բանն այն է, որ սպասում են Հյուսիս-Հարավ ճանապարհի վերջնական կառուցմանը, որի դեպքում կվերանորոգվի մինչեւ Բավրայի մաքսակետ ընկած հատվածը: Իսկ թե երբ հերթը կհասնի Աշոցքին՝ Աստված գիտի:
Լուսանկարը՝ ՆՈՒՆԵ ԱՐԵՎՇԱՏՅԱՆԻ
«Առավոտ» օրաթերթ
05.06.2015
