Եվրասիական տնտեսական միությունում (ԵՏՄ) միասնական արժույթի ներդրումը կարևոր հիմնաքար է, բայց շուտ չի լինի: Ըստ «Tass»-ի՝ այս մասին ասել է ՌԴ նախագահի աշխատակազմի ղեկավար Սերգեյ Իվանովը եւ հավելել, որ թեեւ ԵՏՄ-ն այժմ պատրաստ չէ գնալ այդ քայլին, բայց մի օր միասնական արժույթը կկիրառվի:
Իվանովը ԵՏՄ-ի կառուցումը երկար գործընթաց է անվանել եւ հիշեցրել է, որ Եվրամիությունը արդեն 50 տարուց ավելի է զարգանում, իսկ «մենք դեռ ճանապարհի սկզբին ենք»:
ԵՏՄ 5 երկրների բնակչության մեծամասնությունը, ըստ ՌԴ պաշտոնյայի, սատարում են այս միավորմանը: «Ես լիովին վստահ եմ, որ մեր «հնգյակում» շատերը սատարում են ԵՏՄ-ին: Կարող են լինել մարդիկ, որոնք չեն հավանում այն: Բայց Եվրամիությունում էլ շատերին դուր չի գալիս այդ կառույցը: Ես կասկածում եմ, որ կա բան, որի համար կարող են չհավանել. այնտեղ այնպիսի բյուրոկրատական համակարգեր են, որ ՌԴ-ն նույնիսկ երազում չի տեսնում»:
Պատրաստեց Աշոտ ԻՍՐԱԵԼՅԱՆԸ
