Հայաստանի ազգային պոլիտեխնիկական համալսարանի հոգաբարձուների խորհրդի որոշմամբ բուհի ռեկտոր ընտրվեց ՀՅԴ անդամ, ԱԺ նախկին պատգամավոր, Պոլիտեխնիկի նախկին ռեկտոր Ոստանիկ Մարուխյանը:
Հիշեցնենք, որ թեկնածուները երկուսն էին: Ոստանիկ Մարուխյանից բացի, բուհի ռեկտորի պաշտոնը ստանձնելու հայտ էր ներկայացրել նաև ռեկտորի ժամանակավոր պաշտոնակատար Հովհաննես Թոքմաջյանը:
Խորհրդի 32 անդամներն էլ մասնակցել են փակ, գաղտնի քվեարկությանը: Քվեաթերթիկներից մեկն է համարվել անվավեր: Ոստանիկ Մարուխյանին կողմ է քվեարկել 19, Հովհաննես Թոքմաջյանին՝ 11 անդամ:
Նորընտիր ռեկտորին ամբիոնից առաջինը շնորհավորեց Հովհաննես Թոքմաջյանը և ցանկացավ, որ նա կարողանա Պոլիտեխնիկում իրականացնել իր առաքելությունը. «Ես արել եմ այնքան, որքան կարողացել եմ»,- հավելեց նա:
Կարդացեք նաև
Ոստանիկ Մարուխյանն իր հերթին շնորհակալություն հայտնեց խորհրդի բոլոր անդամներին և իր մրցակցին. «Շատ շնորհակալ եմ, պարոն Թոքմաջյան, որ մենք լուռ պահպանեցինք մրցակցային գործընթացի պայմանները և շնորհակալ եմ, որ Դուք առաջինը ինձ շնորհավորեցիք: Տա Աստված, որ այն, ինչ փորձում ենք իրականացնել, իրականացնենք միասին և այս հաստատության սահմաններում: Պոլիտեխնիկը մեր տունն է: Մենք այդ տան զավակներն ենք, եկեք պահպանենք այդ տունը, զարգացնենք, կառուցենք նորը, ավելի լավը, ավելի գեղեցիկը: Պոլիտեխնիկը ապագա ունի, եկեք սատարենք այդ ապագային»,- ամփոփեց նորընտիր ռեկտորը:
Նշենք, որ հոգաբարձուների խորհրդի նիստը վարում էր խորհրդի նախագահ Սամվել Նիկոյանը: Նիստն սկզբում՝ մինչ ընտրությունները, մի փոքր ավելի լարված մթնոլորտում էր ընթանում:
Բանն այն է, որ Սամվել Միկոյանի կողքին նստած էր Կրթության և գիտության նախարար Արմեն Աշոտյանը: Այդ հանգամանքը դուր չեկավ խորհրդի անդամներից մի քանիսին, և նրանք առաջարկեցին նախարարին թողնել նախագահությունը և տեղ զբաղեցնել դահլիճում՝ իրենց շարքերում: Ի պատասխան՝ Սամվել Նիկոյանը նշեց, որ Արմեն Աշոտյանը բոլոր համալսարանների նիստերում էլ նստում է նախագահությունում: «Եթե որևէ մեկին հրավիրում եմ նստել այստեղ, ես դա քննարկման թեմա չեմ դարձնում»,- ընդգծեց նա: Խորհրդի անդամներից մեկն արձագանքեց, որ նախարարի՝ այդտեղ նստելն ավելորդ ճնշում է իրենց և նիստը նախագահողի վրա. «Նախարարի՝ այդտեղ նստելը միմիայն մեր վրա ճնշում գործադրելու համար է, ձեր վրա էլ են ճնշում գործադրում»,- նշեց նա:
«Մենք էլ, դուք էլ ճնշվողը չենք»,- եղավ Նիկոյանի պատասխանը: Իսկ խորհրդի անդամը շարունակեց. «Ավելորդ լարվածություն մի ստեղծեք: Մենք համաձայն ենք, որ դուք նախարար եք»:
Նախարարը ոչինչ չպատասխանեց, բայց և տեղից էլ չշարժվեց:
Սիրանուշ ՀԱՅՐԱՊԵՏՅԱՆ
