Հայկական տեխնոլոգիական կրթության մոդելը շարունակում է իր միջազգային տարածումը։ Հոկտեմբերի 22-ին Իրաքի Քուրդիստանի տարածաշրջանի Ռանյա քաղաքում պաշտոնապես բացվել է «Արմաթ» ճարտարագիտական նոր աշխատանոցը, որը նոր հնարավորություններ է բացում տեղի պատանիների համար։
Ծրագրի միջազգային այս նախաձեռնությունը կյանքի է կոչվել Հայաստանի Առաջատար տեխնոլոգիաների ձեռնարկությունների միության (ԱՏՁՄ) և Իրաքում Ռապարինի տարածաշրջանային զարգացման գործակալության (RRDA) համագործակցությամբ՝ Էրբիլում ՀՀ գլխավոր հյուպատոսության աջակցությամբ։
Բացման պաշտոնական արարողությանը ներկա են գտնվել Իրաքի Հանրապետությունում Հայաստանի Հանրապետության արտակարգ և լիազոր դեսպան Ռուբեն Սողոյանը, Իրաքի Քուրդիստանի տարածաշրջանի մայրաքաղաք Էրբիլում Հայաստանի Հանրապետության գլխավոր հյուպատոսի պարտականությունները կատարող Ռաֆայել Մովսեսյանը, Քուրդիստանի տարածաշրջանային կառավարության փոխվարչապետ Քուբադ Թալաբանին, «Արմաթ» ծրագրի ղեկավար Սեդրակ Վարդանյանը և այլ պաշտոնյաներ։ Մեկ շաբաթյա ժամկետում տեղացի խմբավարների նոր թիմը մասնակցել է ծրագրավորման և ռոբոտաշինության տեսական և գործնական վերապատրաստմանը, որը վարել է «Արմաթ»-ի խմբավար Արմեն Մխոյանը։
«Արմաթ»-ի միջազգային ընդլայնումն ապացուցում է, որ հայկական ճարտարագիտական կրթական այս մոդելը մրցունակ և պահանջված է համաշխարհային մասշտաբով։ Մեր նպատակն է ստեղծել նոր սերունդ, որը ոչ միայն օգտվում է ժամանակակից տեխնոլոգիաներից, այլև ինքն է ստեղծում դրանք»,– նշել է ԱՏՁՄ գործադիր տնօրեն Էդիտա Ղազարյանը։
Կարդացեք նաև
«Արմաթ» ճարտարագիտական աշխատանոցների ծրագիրը ստեղծվել և զարգանում է Հայաստանում՝ նպատակ ունենալով խթանելու STEM (գիտություն, տեխնոլոգիա, ճարտարագիտություն, մաթեմատիկա) կրթությունը։ Այսօր Հայաստանի հանրակրթական դպրոցներում արդեն գործում է շուրջ 642 «Արմաթ» աշխատանոց, որոնցում անվճար կրթություն է ստանում շուրջ 17,000 սան։ Ծրագիրն իրականացվում է ՀՀ ԿԳՄՍՆ օժանդակությամբ։
«Արմաթ»-ի առաքելությունը վաղուց դուրս է եկել Հայաստանի սահմաններից․ սա արտերկրում բացված 18-րդ աշխատանոցն է։ «Արմաթ Գլոբալ» (Armath Global) նախաձեռնության շրջանակում ճարտարագիտական այս միջավայրերը հաջողությամբ գործում են նաև մի շարք այլ երկրներում, այդ թվում՝ ԱՄՆ-ում, Ֆրանսիայում, Վրաստանում, Իրաքում, Քուվեյթում և Բանգլադեշում՝ միավորելով պատանիներին մեկ ընդհանուր գաղափարի շուրջ՝ դառնալու ապագայի նորարարներ ու խնդիրներ լուծողներ:
Առաջատար տեխնոլոգիաների ձեռնարկությունների միություն
