Երեկ մեկնարկել է ՀՀ նախկին վարչապետ Անդրանիկ Մարգարյանի հուշամրցաշարը, որը 6-րդ անգամ կազմակերպում է Հայաստանի շախմատի ակադեմիան:
Հուշամրցաշարն անցկացվում է երկու խմբով. շվեյցարական մրցակարգով մինչեւ 18 տարեկան պատանիների եւ աղջիկների միջեւ եւ շրջանային՝ Հայաստանի, Ռուսաստանի, Իրանի եւ Ուկրաինայի 10 շախմատիստների մասնակցությամբ:
Ուժեղների պայքարում հանդես են գալիս գրոսմայստերներ Ալեքսանդր Բորտնիկը (Ուկրաինա), Տիգրան Քոթանջյանը, Գեւորգ Հարությունյանը (երկուսն էլ՝ Հայաստան), միջազգային վարպետներ Դավիթ Պառավյանը, Մաքսիմ Չիգաեւը (երկուսն էլ՝ Ռուսաստան), Ամին Տաբատաբայը (Իրան), Տիգրան Ս. Պետրոսյանը, Տիգրան Կ. Հարությունյանը, ՖԻԴԵ-ի վարպետներ Դավիթ Շահինյանը, Հայկ Մարտիրոսյանը (բոլորն էլ՝ Հայաստան):
Կարդացեք նաև
Մրցաշարի գլխավոր մրցավար, միջազգային կարգի մրցավար Նորայր Քալանթարյանն Aravot.am-ին տեղեկացրեց, որ շրջանային մրցակարգով մրցաշարում սահմանված է գրոսմայստերական բալ. 6,0 միավոր՝ 9,0 հնարավորից: Հարցին, թե ի՞նչն է պատճառը, որ արդեն իսկ գրոսմայստերի կոչում կրող շախմատիստները նույնպես մասնակցում են այս մրցաշարին, Ն. Քալանթարյանը պատասխանեց. «Սա երիտասարդ գրոսմայստերների համար մրցափորձ է, պրակտիկ մարզավիճակ պահպանելու լավ հնարավորություն: Ապա, կազմակերպիչներն ընտրում եւ հրավիրում են երիտասարդ, ամբիցիոզ եւ հեռանկարային շախմատիստների»:
Երեկ մեկնարկային տուրում հաղթանակ են տարել միայն միջազգային վարպետ Տիգրան Ս. Պետրոսյանը եւ ՖԻԴԵ-ի վարպետ Հայկ Մարտիրոսյանը:
Աշոտ ՀԱԿՈԲՅԱՆ
