Գորիսի ոստիկանապետ Գևորգ Ազիզյանի մասնակցությամբ տեղի ունեցած միջադեպի փաստով ծառայողական քննությանը կհաջորդի կոծկումը»,- համոզված է իրավապաշտպան Ժաննա Ալեքսանյանը:
Իրավապաշտպան Ժաննա Ալեքսանյանի համոզմամբ, ոստիկանությունում ծեծը առաջնահերթ խնդիրները լուծելու ձեւ է. «Դա հրապարակային ու շատ հաճախ անթաքույց է արվում, պարզապես երբեմն նման դեպքերն ի հայտ են գալիս: Ոստիկանապետը թող կարգավորի իր համակարգը, որն իսպառ հեղինակազրկված է»:
Իրավապաշտպանի խոսքով, ոստիկանությունում ոչինչ չի փոխվել ու չի փոխվի. «Հենց այս ոստիկանապետի գլխավորած ոստիկանությունն էր, որ հայտնի դարձավ որպես բռնի ու բռնություններ կիրառող ոստիկանություն:
Որ ոստիկանական բաժանմունքներում եւ այլ տեղերում ոստիկաններն առաջնորդվում են ծեծով, դա փաստ է, դա փաստված է նաեւ զեկույցներում: Չեմ զարմանում Գորիսի ոստիկանապետի մասնակցությամբ ծեծկռտուքից, որովհետեւ բազմաթիվ հրապարակային ծեծերի ու բռնության դեպքերի ենք ականատես եղել, ցավալին այն է, որ ոչինչ չի փոխվում, ոստիկանապետը ոչինչ չի ուզում փոխել, միայն այսպես ձեւական, կեղծ հայտարարություններ են, որ իբր հանրության աչքին երեւա՝ որպես բարի, հավատացյալ ոստիկանապետ, համոզիչ փաստարկներ չկան»:
Կարդացեք նաև
Ժաննա Ալեքսանյանը մատնանշեց ոստիկանապետի տեղակալին ու ՃՈ պետին. «Իր երկու տեղակալները՝ ՃՈ պետն ու Աշոտ Կարապետյանը բռնի գործողությունների կրող են, դա հաստատվել է մարդու իրավունքների եվրոպական դատարանում. Այնպես որ, վհուկների որսը ոստիկանապետը թող ներսում անի»:
Հիշեցնենք, որ «Ժողովուրդ» թերթը բացահայտել էր մարտի 8-ին Գորիսում աղմկահարույց դեպք, որում ներգրավված են Գորիսի ոստիկանապետ Գեւորգ Ազիզյանը, Սյունիքի մարզի դատախազ Վազգեն Հարությունյանը, նրա տեղակալը` Ասպուր Ավետիսյանը, քննչական կոմիտեի Սյունիքի մարզային վարչության պետ Վահրամ Դաղունցը:
Արփինե ՍԻՄՈՆՅԱՆ
