Բելառուսի Արտաքին գործերի նախարարության մամուլի քարտուղար Դմիտրի Միրոնչիկը հայտարարություն է արել Լեռնային Ղարաբաղի հակամարտության շփման գոտում վերջերս իրավիճակի սրման կապակցությամբ։ Այս մասին տեղեկացնում է ռուսական «ՏԱՍՍ» լրատվական գործակալությունը։
Միրոնչիկը իր հայտարարության ընթացքում նշել է նաև, որ Բելառուսը պատրաստ է նպաստել Լեռնային Ղարաբաղի հակամարտության խաղաղ կարգավորման գործընթացին։ Հայտարարության մեջ մասնավորապես ասվում է. «Բելառուսը մշտապես պատրաստ է համագործակցել բանակցությունների սեղանի շուրջ հակամարտության խաղաղ կարգավորման ճանապարհները փնտրելիս։ Ռազմական որոշման, կամ ռազմական օգնության մասին խոսք անգամ լինել չի կարող»։
Բելառուսի արտաքին քաղաքական գերատեսչության մամուլի քարտուղարը մեկնաբանել է նաև ԶԼՄ-ներում շրջանառվող լուրերը, թե Բելառուսը ռազմական օգնություն է ցուցաբերել հակամարտության կողմերից մեկին. «Ինչ վերաբերվում է որոշ ԶԼՄ-ներում շրջանառվող տեղեկություններին, թե Բելառուսը ռազմական օգնություն է ցուցաբերել կողմերից մեկին, կարող եմ ասել, որ դրանք ամբողջովին ասեկոսեներ են, որոնք չունեն որևէ հիմք»։
