«ՀՀ-ն պետք է հնարավորություն ունենա այլ ուժային կենտրոնների աջակցությունը ստանալով՝ մնա ԵԱՏՄ-ի և ՀԱՊԿ-ի շրջանակներում»,- այսօր «Փաստարկ» մամուլի ակումբում հայտարարեց Հանրապետական խմբակցության պատգամավոր Գագիկ Մինասյանը`պատասխանելով հարցին`չի՞ կարծում, որ ՀՀ-ն պետք է քայլեր ձեռնարկի ԵԱՏՄ-ից եւ ՀԱՊԿ-ից դուրս գալու ուղղությամբ, քանզի այս չորսօրյա պատերազմը ցույց տվեց, որ այն փաստարկը, թե այդ կառույցները մեր երկրի անվտանգությունն են ապահովում, սին է:
«Մենք ստանում ենք արտոնյալ գներով զենք ՌԴ-ից, քան Ադրբեջանն է ստանում, մեր ֆինանսական հնարավորությունները թույլ չէին տա այն հնարավորությունները, որ ունենք, եթե չլինենք ՀԱՊԿ անդամ, բայց մենք պետք է փորձենք մեր անվտանգության կոմպոնենտները համադրել այլ հնարավորություններով: Պետք է հնարավորություն ունենանք այլ ուժային կենտրոնների աջակցությունը ստանալով՝ մնալ ԵԱՏՄ, ՀԱՊԿ-ի շրջանակներում, ինչը բխում է մեր ազգային պետական շահերից»,- ասաց նա:
Իշխանական պատգամավորն արձանագրում է`ՀԱՊԿ-ում եւ ԵԱՏՄ-ում ՀՀ-ի շահն ապահովվում է այնքանով, որքանով…: Իսկ եթե չի բավարարում՝ ունենք հետեւյալ ճանապարհը. «Այդ մասին բարձրաձայնելու բարձր մակարդակով եւ այդ կառույցներում գտնել լրացուցիչ կոմպոնենտ, որոնք կլրացնեն այդ բացը»:
Կարդացեք նաև
Անդրադառնալով ՀԱՊԿ-ում և ԵԱՏՄ-ում անդամ երկրների արձագանքը չորսօրյա պատերազմին՝ ՀՀԿ պատգամավորը նորություն չի համարում: «Խնդիրն այն է, որ ԵԱՏՄ անդամ երկրների պահվածքը նորություն չէ ոչ միայն Հայաստանի համար: Նույն պահվածքը կիրառվում է նաև ՌԴ-ի նկատմամբ: ՌԴ-ի համար երկու կարևորագույն խնդիրներին՝ ուկրաինական կամ ռուս-թուրքական հարցերում ԵԱՏՄ մեկ անդամի չեք տեսնի, բացառությամբ ՀՀ-ի, որ ՌԴ-ի տեսակետը պաշտպաներ»:
Ամեն դեպքում, անգամ իշխանական պատգամավորն է ԵԱՏՄ վարչապետների նիստը ՀՀ-ից տեղափոխելու որոշումը անթույլատրելի համարում. «Որովհետև հենց այս ժամանակ պետք է հավաքվեին գործընկերոջ տանը և վրդովմունք արտահայտեին, դա տեղի չունեցավ, այդ մասին ևս պետք է բարձրաձայնենք ամենաբարձր մակարդով»:
Նելլի ԳՐԻԳՈՐՅԱՆ
