Գյումրիում տեղակայված ռուսական 102-րդ ռազմաբազայում շարունակվում է Ավետիսյանների ընտանիքի սպանության մեջ մեղադրվող Վալերի Պերմյակովի դատավարությունը:
Այսօր ցուցմունք էր տալու Պերմյակովը, սակայն վերջինս հրաժարվեց ցուցմունք տալուց՝ ընդամենը պատասխանեց իր փաստաբանի մի քանի հարցերին:
Հարցին՝ ֆիզիկապես ու հոգեպես ի՞նչ վիճակում ես գտնվում, հնչեց պատասխան՝ նորմալ: Հաջորդ հարցին՝ ինչ-որ բանից կաշկանդվա՞ծ եք, պատասխանեց՝ ոչ:
Հարցին՝ կա՞ արդյոք խոչընդոտ կամ արգելք, որը կաշկանդում է ձեզ ցուցմունք տալ, Պերմյակովը հրաժարվեց պատասխանել: Ճշտող հարցին՝ որեւէ մեկը վախեցնո՞ւմ է ձեզ ցուցմունք տալ, ամբաստանյալն ասաց՝ ոչ:
Կարդացեք նաև
Հարցին՝ հասկանո՞ւմ եք, որ ցուցմունք չտալու դեպքում կհրապարակվի ձեր նախաքննական ցուցմունքը, ասաց՝ այո: Նա նաեւ ասաց, որ հասկանում է, թե օրենքով սահմանված ինչ պատիժ է իրեն նախատեսվում: Ասաց, որ իր տված նախաքննական ցուցմունքի մեջ որեւէ բան չունի փոխելու:
Հարցին՝ դուք գնացել էիք Ավետիսյանների տուն ավազակային հարձակմա՞ն, Պերմյակովն ասաց՝ հրաժարվում եմ պատասխանել: Հարցին՝ արդյոք Ավետիսյանների սպանությունը դուք միայնա՞կ եք իրականացրել, Պերմյակովը հրաժարվեց պատասխանել:
Դատարանը հրապարակեց նրա նախաքննական ցուցմունքը ու ցուցադրեց ցուցմունքի տեսաձայնագրությունը:
Նունե ԱՐԵՎՇԱՏՅԱՆ
