Օրերս Եռաբլուրում շարքային զինվոր, ղարաբաղա-ադրբեջանական շփման գծում զոհված 19-ամյա Գրիգոր Հարությունյանի հուղարկավորությունն էր:
Հարազատները պատմում էին, որ Գրիգորը ըմբշամարտիկ է եղել, իր քաշային կարգում առաջին մրցանակակիր, բայց սոցիալական պայմաններից ելնելով՝ չի շարունակել զբաղվել սպորտով: Մինչ բանակ գնալը վերջին 8 ամսվա ընթացքում նա անգամ ուսումն է կիսատ թողել, որ աշխատի:
Aravot.am-ի հետ զրույցում մեր հարցին՝ որտե՞ղ է աշխատել նա՝ Գրիգորի մորաքույրը՝ Անահիտը պատասխանեց. «Ինչ գործ ասես, որտեղ հնարավորություն է ունեցել՝ աշխատել է, այգիներում աշխատել է, կարուսելների վրա է աշխատել, մանկական այգիներում էլ է քնել, որ հաջորդ օրը առավոտ շուտ մաքրի, պատրաստի: Ով ինչ գործ առաջարկում էր՝ անում էր: Մոր հետ հավասար աշխատել է, ամեն ինչ արել է, որ կարողանա նաեւ փոքր եղբորը օգնի»:
Հուղարկավորության ժամանակ զինվորի հարազատները պատմում էին, թե ինչ ծանր վիճակում է ապրում Գրիգորի ընտանիքը. «Գաջեգործների 40, 16 բնակարան, եթե դուք այցելեք, մտնեք նրանց տուն՝ կհասկանաք, թե ինչպես են ապրում վթարային այդ տանը»:
Կարդացեք նաև
Հուղարկավորությանը ներկա մի խումբ կանայք բորբոքված էին: Նրանք վիշտը թողած՝մի շարք հարցադրումներ էին անում ու հորդորում մեզ՝ լրագրողներիս, այդ հարցերը տեղ հասցնել. «Ո՞վ է այս մայրերին պատասխան տալու, մի հարց տալի՞ս եք մեր նախագահին: Նա դրա պատասխանն ունի՞: Մեր կառավարությունը ի՞նչ է ասելու: Մի հատ հարուստի երեխա չբերեցին, բոլորը աղքատներ: Էս քանի տարի է՝ օրը մի դիակ բերում են, մի՞թե պատրաստ չէին, որ էսքան զոհ ունեցանք»:
Կանանց հակադարձեցին Գրիգորի սգացող բարեկամներից մի քանիսը. «Ստեղ դրա տեղը չի՛: Թողեք մեզ մեր սգի հետ, կարողանանք համակերպվել: Էդ հարցերի պատասխանները հետո ու ուրիշ տեղ կփնտրենք, էդ բոլորը մենք էլ շատ լավ գիտենք, բայց հիմա վերլուծելու ժամանակը չէ»:
Հռիփսիմե ՋԵԲԵՋՅԱՆ
