Այսօր Ռուսաստանի Դաշնության մայրաքաղաք Մոսկվայի կենտրոնում տեղի է ունեցել սույն թվականի մարտի 27-ին հիմնադրված «Հայկական վերածնունդ» համառուսաստանյան հասարակական կազմակերպության գրասենյակի բացման հանդիսավոր արարողությունը, որին մասնակցում էին ռուսաստանյան և հայազգի հայտնի քաղաքական ու հասարակական գործիչներ, գործարարներ, մշակութային գործիչներ, մտավորականներ: Գրասենյակի բացմանը ողջույնի խոսքով հանդես է եկել «Հայկական վերածնունդ» հասարակական-քաղաքական միավորման ղեկավար Արթուր Բաղդասարյանը, ով շնորհավորելով ներկաներին ասել է, որ Մոսկվայի կենտրոնում բացված գրասենյակը կարևոր գործնական քայլ էր «Հայկական վերածննդի» առջև դրված նպատակները կյանքի կոչելու համար: Այն դառնալու է շատ կարևոր օղակ ինչպես հայ ռուսական հարաբերությունների, այնպես էլ ռուսաստանաբնակ հայ համայնքի ու հայրենիքի միջև կապերի ամրապնդման գործում: Արթուր Բաղդասարյանը նշել է , որ Մոսկվայում բնակվող ցանկացած հայ պետք է իմանա, որ այս գրասենյակը նաև իրենն է ու գրասենյակը իր ամենօրյա աշխատանքով պետք է աջակցի մեր հայրենակիցներին՝ հնարավորության սահմաններում փորձելով լուծում տալ առկա խնդիրներին: Արթուր Բաղդասարյանը տեղեկացրել է նաև, որ առաջիկայում նման գրասենյակներ կբացվեն Ռուսաստանի շուրջ 20 նահանգներում:
Ելույթով հանդես է եկել նաև միջոցառմանը մասնակից ՌԴ Պետդումայի փոխխոսնակ, ՌԴ նախագահի կողմից ղեկավարվող « Ազգային ճակատ» համառուսաստանյան շարժման փոխնախագահ Սերգեյ Ժելեզնյակը: Ողջունելով ներկաներին՝ ՌԴ փոխխոսնակը շնորհակալություն է հայտնել «Հայկական վերածնունդ» հասարակական-քաղաքական միավորման ղեկավար Արթուր Բաղդասարյանին նման կարևոր նախաձեռնության համար և նշել, որ համոզված է, որ այս կառույցը իսկապես կնպաստի հայ-ռուսական հարաբերությունների ավելի ամրապնդմանը՝ ինչպես հասարակական-քաղաքական, այնպես էլ հանրային կյանքի տարբեր ոլորտներում, քանզի նախաձեռնության հեղինակը ամբողջությամբ պատկերացնում է հայ-ռուսական հարաբերությունների ամբողջ սպեկտրը , զարգացման տեսլականը և ունի պետական-քաղաքական ոլորտի գործունեության հարուստ փորձ: Սերգեյ Ժելեզնյակը վստահեցրել է, որ իրենք կանեն ամեն ինչ, որպեսզի նպաստեն «Հայկական վերածնունդ» համառուսաստանյան հասարակական կազմակերպության առջև դրված նպատակների իրականացմանը:
Հանդիպմանը ելույթով հանդես են եկել նաև Վիկտոր Կրիվոպուսկովը, հայտնի գործարար և մեցենատ Վարդգես Արծրունին, հասարակական ոլորտի տարբեր ներկայացուցիչներ, հայտնի անհատներ: Վարդգես Արծրունին ընտրվել է «Հայկական վերածնունդ» համառուսաստանյան հասարակական կազմակերպության պատվավոր նախագահ:
«Հայկական վերածնունդ»
